Fahrettîn Şahîno ke 30 serran zîndan de mend, semedo ke îdareyê zîndanî nêwaşt veradayîşê ci 6 mengan ame taloqkerdene. Qanûnê Înfazî yo newe ke çeleyê 2021î de kewt dewre mîyanê çend mengan de xeylêk reyî heqê merdiman ameyî binpaykerdene. Hemvervatoxa Komîsyonê Zîndanan a OHDyî Destîna Yildiz derheqê babete de ANFyî rê qisey kerd.

Destîna ard ziwan ke îdareyê zîndanî pê bahaneya 'rewşa ci hol nîya' vera nêdîyaye û vat: ''Îdareyê zîndanî îdîa kerd ke kitabxaneyê dezgehî ra 5 kitabî wendê, mîyanê dezgehî de têgêrayîşê ci hol nîyê, tewrê bernameyanê başkerdişî nêbî.  Pê nê bahaneyan 'rewşa hol nîya' ameye tesbîtkerdene. Tepişteyê ke heqê înan ê veradayîşî esto pê bahaneyanê keyfîyan nênê veradayene.''

Destîna da zanayene ke tepişteyanê grevê vêşanîye rê vera cezaya dîsîplînî dîyena û nê cezayî ercnayîşê 'tewirê holî' de verê veradayîşî de sey astengîye şuxilîyenê. Destîna vat: ''Îdareyî nê cezayî sey gefan xebitnenê. Zîndanê Şakranî de pê na cezaya dîsîplînî vera nêdîyaye û beşdarîya grevê vêşanîye zî sey bahaneya ci ameye mojnayene. Yanî îdareyî vanê 'Eke ti tewrê grevê vêşanîye bibî nêeşkenî serbest bibî.' ''

Destîna pare kerd ke Qanûnê Înfazî yo Newe 4-5 mengî yo dewre de yo û vat: ''Nê prosesî de sey yê Fahrettîn Şahîn ma bîyî şahîdê zaf biran. Zîndanê Tekîrdagî de muwekîlê ma yo ke 29 serrî yo zîndan de yo û pê bahaneya 'wayîrê erjan ê manewîyan ê rêxistine' vejîyeno vera nêdîyeno. Nê prosesî de tay meseleyî zî estê. Wextê pêvînayîşê bi tepişteyan de persê sey 'Şima Abdullah Ocalanî sey lîderê xo vînenê, Rayberê to kam o, Şima çira koxûş de yê, Tîje seba to yena çi mana' înan rê yenê perskerdene. Mekanîzmayêke çin a ke nê pêvînayîş û persan kontrol bikera. No proses kêfî yo û eleqeyê ci pê edaletî çin o.''