Hemsereka Pêroyî ya HDPyî Pervîne Buldan Newroza Îstanbulî ke bi se hezaran kesan meydan kerd pirr de xîtabê şarî kerd.

Buldane Newroze sîyasetmedaranê ke zîndanan de yê pîroz kerde û vat: ''Newroze têna roşanêk nîyo, têna mijdanê wisarî nîyo, Newroze nasnameyê ma yo, Newroze anor û kulturê ma yo.''

Buldane bale ante hêrişanê vera HDPyî ser û vist vîrî ke prosesê zehmetî ra ravêrenê û vat: ''Şarê Tirkîya ya tarî ya zî roşnayî vîjnenê. Ma pê bawerê ke şar do vajo hînî bes o. Ma roşnayî vîjnenê. Ma nê tewirê cuye ke ma rê ameyo fasilnayene çirey qebûl nêkenê. Heme nasname û bawerîyê cîya cîya ke nê welat de raştê neheqîyê yene ganî pîya têbigêrê. Ganî vîjnayîş ma ders bidê AKP û wertaxê ci yê qicî. Êyê ke vanê ma HDPyî qefilnenê wa biewnê nê meydanî ra siba zî biewnî meydanê Amedî ra. Eke şima 600 kesan rê sîyasetî qedexe bikerê ma sey 12 mîlyonan sîyaset kenê.''

Bauldane vera betalkerdişê Pêkerdişê Îstanbulî nêrazîbîyayîş ramojna  vat: ''Înanê ke Pêkerdişê Îstanbulî betal kerd wa bizanê ke qala peyêne cinîyî vanê. Pêkerdişo ke pê qerarê heme partîyan ame qebulkerdene pê qerarê yew merdimî nîno betalkerdene. Heta ke cinîyî mevajê qedîya do no pêkerdiş nêqedîyo.''

Pervîne Buldane bale ante muhîmîya Newroze ser û vat: ''Têhetameyîşê Newroze  yeno manaya xoverdayîşî. Ma xora verê zulmî de milê xo çewt nêkenê. Newroza 2013î de birêz Ocalanî manîfestoyo ke şawit hema mezg û zerrîyan de yo. Eke o manîfesto qebul bibîyêne ewro Tirkîya de krîzî nêameyêne qewimîyayênê û haştîye ameyêne welatî. Ma sey HDPyî hema peyê nê manîfestoyî de yê. La înan manîfesto red kerd, tecrîd hîna xorî kerd û destûr nêdanê ke keye û avûkatê birêz Ocalanî ey bivînê. Paşta înan qanûnê ci ra zî sist a.  Eke haştîye bêro heme problemê welatî yenê çareserkerdene. Wa Newroze bibo wesîleya azadîye û haştîye. Newroze pîroz bo.''