Platformê Şubeyanê Îstanbulî yê Keskî koma qanûnan a ke îqtîdar wazeno Meclîs de bido qebulkerdene û zemo kêm ê seba karmenc û teqawutan qezaya Kadikoyî ya Îstanbulî de protesto kerd. Çalakîye de pankarta 'Ma sînorê vêşanîye de ciwîyenê. Meaşê kedkaran ganî serê sînorê vêşanîye de bibo' ameye akerdene. 

Vervatoxa Platformê Şubeyanê Îstanbulî yê KESKî Ayfere Koçak çalakîye de eşkerayîye wende û vist vîrî ke îqtîdar seba ke sozê xo nêaro ca hîleyan keno û bi pêşnîyazê koma qanûnan a bacan bara kedkaran û şarî giranêr keno.

Koçake îfade kerd ke bi pêşnîyazê koma qanûnan budçeya 2023yî giranêr bena û kedkarî do hîna zaf bacan bidê. Koçake da zanayene ke ê do koma qanûnan qetî qebul nêkerê û vera polîtîkayanê îqtîdarî têkoşîn bikerê.