Hemserekanê DEM Partî Tulaye Hatîmogullari û Tuncer Bakirhanî çarçewa vengdayîşê Rayber Apoyî de temsîlkaranê Partîya Karkeran a Tirkîya (TÎP) de pêvînayîş kerd.

Serekê TÎPî Erkan Baş, Hetkarê Serekî Dogan Ergun, Vervatoxa TÎPî Serra Kadigil û Wekîlê TÎPî Ahmet Şikî Hemserekê DEM Partî pêşwazî kerdî.

Pêvînayîşî ra dima Erkan Başî qisey kerd û vat: ‘’Seba haştîye demokrasî şert o. Ma qalê çekverdayîşî kenê la ganî çeka muhakemekerdişî ya îqtîdarî zî bêveng biba. Ganî no proses Meclîs de bêro nîqaşkerdene. Haştîye îhtîyaca nê welatî ya.’’

Tulaye Hatîmogullari pare kerd ke pêvînayîşê înan do heta peynîya adare dewam bikerê. Tulaye vat: ‘’Girîng o ke gonîye vindera û dadîyî mebernê. Birêz Abdullah Ocalanî zî waşt ke pêro beşê komelî paştî bidê nê prosesî.’’

Tulaye bale ante peymana mabênê QSD û hukmatê Şamî ser û vat: ‘’Na peymane armanc kena ke qirkerdişê vera durzî, elewî û şaranê bînan ê Sûrîye zî vindarna. Ma zaf girîngîye danê na peymane û vînenê ke vengdayîşê Ocalanî tesîrê Sûrîye zî keno.’’

Tulaye pare kerd ke ê do partîyanê îtîfaqê Cumhurî zî rojanê verê ma de zîyaret bikerê û vat: ‘’Seba ke no proses bi aktîfî dewam bikero ganî her kes bieşko Birêz Ocalan de pêvînayîş û dîyalogan bikero. Seba ke şertê xebitîyayîşê Birêz Ocalanî bêrê raştkerdene ganî Meclîs çîyê hewceyî bikero. 

Ma wazenê ke heyetê ma zî ancî do şoro Îmraliyî. Hema plano winayên çin o la ganî heyet şoro. Ganî seba pêro terefan berê Îmraliyî abibê.’’