Nêzdê serrek o ke Rayberê Şarê Kurdî Abdullah Ocalanî ra xebere nîna girwetene. Abdullah Ocalanî roja pancşemeyî hendê 5 deqayan birayê xo Mehmet Ocalanî dir bi rayîrê telefonî qisey kerd. Mehmet Ocalanî ke ard ziwan ke pêvînayîş nişka birîya vat Abdullah Ocalanî vato ez wazena avûkatî bêrê tîya ma pêvînayîş bikerê. Avûkatanê Buroyê Huqûqî yê Asrinî ra avûkat Cengîz Yureklîyî derheqê pêvînayîşê telefonî yê badê 11 mengan û tecrîdê mutlaqî de ANFyî rê qisey kerd.

Pê vîrê komelî kay kenê

Yureklîyî pêvînayîşê telefonî sey leteyêkê bînî yê tecrîdê 22 serran name kerd û vat: ''No pê refleksanê komelî kaykerdiş o. Pê vîrê komelî kay kenê. Xirêt kenê ke komelî nayî rê bumusnê.Yewna îzahê nayî çîn o.  Berpirsîyarîya ci zî pîl a. Goreyê qanûnî nîyo. Pêvînayîşo kilm ê Abdullah Ocalanî rewşa bitehluke ya. Vatbi 'şima ferqê nayî de yê, ez nayî qebul nêkena' na eşkerayîya krîtîka ke tay hususan vejena werte.''

Yureklîyî vist vîrî ke Zîndanê Îmraliyî semedê Abdullah Ocalanî sey warê tecrîdî ame amadekerdene ke goreyê mekanîzmaya huqûqkî nîyo û wina dewam kerd: ''Eslê xo de pê nayî yeno waştene ke yew sîyaset bêro dîzaynkerdene. Tewirê komelkî ameyî hesabkerdene. 22 serrî bîye de. Na mana de di kumeyê persan estê ke ganî bêrê cewabkerdene;

* Goreyê heq û hurîyetê esasî yo, na babete çi eşkeno bibo, ganî çi bibo, netîceyê nayî çî yo?

* Pê zanayîşê Abdullah Ocalan ûca de yeno tecrîdkerdene no têna meseleyêka zîndanî yo, pê zîndanî sînordar o?

Ganî nê bêrê qiseykerdene û ercnayene. Xora na rewşe ne goreyê Qanûnê Bingeyî ya ne zî goreyê qanûnê mîyanneteweyî ya ke Tirîya pêkeridişê ci îmza kerdî. Her çî ra ver tecrîdo winayên çîn o. Ewropa û dînya de çîyo wanayên çîn o. Qebulkerdişê nayî munkun nîyo. Heq û azadîye esasî qet nêeşekenê bibê babeta şantajî. 22 serrî yo tecrîdo bêmabên û mutlaq yeno rayraberdene.''

Qet normêkê ehleqî û komelkî qebul nêkeno

Avukat Yureklîyî tabloyê Îmrayîlî wina ard ziwan: ''Zîndanê girawêk de şertanê hucre de çar merdimî, nasnameyê înan esasî kurd ê. Seba ke semedê haştîye û demokrasîyî mucedele kenê bedel danê. Goreyê qanûnan cezaya înan muebedî ra cor de ya. Tekîlîya înan bi dinyaya teberî birîyaya. Ma qet nêeşekenê zanayîşêk biresnê înan û qiseykerdişê 5 deqayan ameyo kerdene.Normê ehleqî û komelkî yê merdimîye nayî çirey qebul nêkenê. Yeno waştene ke ê ûca de hetê ruh û bedenî ra bihelisîyê.''

Na têna meseleya zîndanî nîya

Yureklîyî bale atne hetê komelkî yê tecrîdî ser û vat: ''Ûca têna yew 'tepişte' nîno tepiştene. Abdullah Ocalan semedê haştîye yew kela ya. Ma eşkera vajê ke şertanê Tirkîya de  çew/e nêşkeno qala haştîye bikero. Têna rewşa  pêkewtişî ya mabenê şaran zî ma nêvanê. Azadîya îfadeyê azadîye û rêxistinbîyayîşî çîn a. Krîzê ekonîmî esto. Pêkerdişê Îstanbulî ame betalkerdene. Her roje wakayê şîdet û cînayetî estê. Rezerveyê Bankaya Merkezî sebî nîno zanayene. Nêzdîbîyayîşê partîyanê sîyasîyan şima vînenî  û tewirê komelê sîvîlî werte de yo. Topyekun halê kaosî esto. Seba ke hetê warê komelî rê haştîye bêro Abdullah Ocalan proje aferneno û cehd keno ke haştîye bîyaro. Eke ma wina biewnê ci ra ganî semedê haştîye ma wayîrê Abdllah Ocalanî vejîyê.

Muxatabê çareserî Abdullah Ocalan o

Eşkerayo ke heta ke meselaya kurdî nêro çareserkerdene problemê demokrasîyî yê Tirkîya do çareser nêbo. Nê pabesteyê yewbînan ê. Meseleya kurdî meseleyêka awankî ya û semedê çareserîya ci muxatab Abdullah Ocalan o. No têna hetê kurdan û têgêrayîşê sîyasîyî yê kurdan û rayra pêroyîya demokratîkî ra nîno qebulkerdene dewlete/hukmat zî ge-ge na raştîye qebul keno.''

Qedînayîşê prosesî de berpirsîyarîya Abdullah Ocalanî çîn a

Yureklîyî wina dewam kerd: ''Qedîyayîşê demê dîyalogî yê 2015î de berpirsîyarîya Abdullah Ocalanî çîn a. Îqîdarî semedê menfaetê xo qedîna. Abdullah Ocalanî 2016 de zî 2019 de zî semedê haştîye mesajî şawitî  û vat eke dewlete biwazê ê  eşkenê cade haştîye bîyarê la vera nê vengdayîşê dewlete tecrîd kerd giranêr. O wext Abdullah Ocalanî medya de ca girewtene la nika yeno waştene ke bêro krîmînalîzekerdene. Rayapêroyîya demokratîke zî ya bêhêzîya xo ra ya zî rîyê zextê îqtîdarî ra bêhîsgêr o. Zîndanan de 120 rojî yo vera tecrîdî grevê vêşanîye esto. Ganî vengê şar û roşnvîran berz vejîyo. Heta sîstemê teberê huqûqî yê Îmraliyî bibo Tirkîya de qet kesêk/e do azad nêbo. Heta ke şarê kurdî binê zulmî de bê şarê Tirkîya nêeşkenê bibê azad.''

Ganî rayrapêroyîye vengê xo berz bikero

Yureklîyî qiseykerdişê xo wina qedîna: ''Semedê kêmkerdişê nêrazîbîyayîşanê vera heqê cuya Abdullah Ocalanî no pêvînayîşê telefonî ame kerdene. Çi heyf ke no pêvînayîş nêcet mend, telefon birîya. Muwekîlê ma yê bînî tecrîd protesto kerd pêvînayîş qebul nêkerd. Şima qey yew serre nêverdenê xebere bêro girewtene? No ganî bêro îzakerdene. Tecrîdo daîmî esto.  Xebere nîna girewtene.  Dima ra rayapêroyîye rê xeberî yenê vilakerdene û bado zî sey rutînî senî ke her çî rayîr de bo pêvînayîşo kilm ê telefonî yeno kerdene. Pê nayî wazenê vajî vatişê ke yenê kerdene raşt nîyê. Na rewşa psîkolojîk a cîddî ya.''