Endamê Heyetê Rayberdişê Merkezî yê HDPyî Musa Pîrogluyî derheqê hêrişanê vera HDPyî û dewrê neweyî yê Partîya Çep a Keske de ANFyî rê qisey kerd.

Pîrogluyî da zanayene ke seba ke HDP weçînayîşan de nêresayo armancê xo prosesê nîqaşan dest pêkerdo û vat: ''Di astê prosesê nîqaşan est ê; raşteraşt prosesê weçînayîşî, taktîk, îtîfaq û prosesêkê nîqaşan ê serê îdarekerdişê weçînayîşî. Ma şarî ra tay cîya bîyê. Coka mîyanê partîye de zî têkilîye binyke birîyaye. Ney zî hem burokrasîya partîye xurt kerde hem zî rayîrê tewrbîyayîşê partîye asteng kerdî coka partîye zî tabanî ra abirîyaye. Rexneyê ke vera HDP, DBPyî û Partîya Çep a Keske yenê kerdene qebul benê. Partîyanê ma derheqê sîyasetê warê komelkî de xo kerd teng, tewirê xo yê serê karkeran û xizanîye zelal nêkerd. 

Pîrogluyî pare ked ke HDP keno ke Tirkîya bikerî demokratîk, meseleya kurdan çareser bikero, têkoşînê hemparî awan bikero. Pîrogluyî îfade kerd ke HDP partîyêka sîwane ya la paradîgmaya xo ya îtîfaqî teyna seba weçînayîşan awan nêkerda. Pîrogluyî vat: ''Ma bi ronayîşê Îtîfaqê Kede û Azadîye waşt ke yewîya têkoşînî awan bikerê û meseleyanê welatî rê çare bibê. La no ser nêkewt û hesabê cîyayî kewtî dewre. Netîce de prosesê ma zerar dî.''

Pîrogluyî ard ziwan ke kombîyayîşê şarî zaf girîng ê û vat: ''Girîng o ke tabanê partîye mudaxeleyê partîye bikero, wayîrê ci vejîyo û bi hawayêkê xurtêrî wurzo payan ser. Bi xurtkerdişê HDPyî mumkîn o ke peynîya tarîtîye bêra ardene. Ganî her kes ney bizano ke xurtbîyayîşê HDPyî yeno manaya xurtbîyayîşê têkoşînê demokratîkî.''