Bajaranê Goppîngen, Freîbûrg û Bondensse yê Almanya  Newroze bi aktîvîteyan ameye pîrozkerdene.

Bi tewrbîyayîşê Kurdistanijan bajarê Goppîngenî yê Almanya de Merkezê Cimatê Kurdan ê Demokratîkî (MCKD) de Newroze ameye pîrozkerdene. Hemserekê MCKD’yî yê Esslîngenî Faruk Mutluyî qisey kerd û vat, “Ma do vera Dehaq Erdoganî  xo ver ro bidê.” Sîyasetmedara Kurde Zozan Serhate zî qiseykerdişêk kerd. Qiseykerdişan ra dima derheqê şehîdan de sînevîzyon ame nawnayene û hunermendî, Zeynep Enhase, Hozan Sîmar û Koma Dîlan a foklore vejîyayî sehne.

BODENSEE

Kurdistanijê bajarê Bodensee yê Almanya zî ameyî têhet û mîtîngêk viraşt. Kurdistaijî bi rayraşîyayîş ver bi wareyo ke Newroze pîroz bikerê dest bi rayraşîyîşî kerd. Hetê bînî ra dostê Almanijî zî tewrê pîrozkerdişî bîyî. Qiseykerdişê ke ameyê kerdene de vengdayîşî seba paştdayîşê grevê vêşanîye ameyî kerdene. Koma Awazên Çîya, Erîş, Hozan Peywan Arjîn û koma foklore ya Mezopotamya vejîyayî sehne.

FREÎBURG         

Bajarê Freîburgî de bi şewêk şayîya Newroze ameye pîrozkerdene. Qiseykerdişê ke ameyê kerdene de ame vatene ke şaredarîyê ke hetê qeyûman ra ameyê xespkerdene apey ameyî girewtene. Dewamê şayîye de girseyî bi deyîranê Awazê Rojê û Peywan Arjînî govende girewte.