Vizêr şan bernameyê xeberan ê bi nameyê ''Zommî'' yê kanala ZDFyî yê Almanya de xebetê MÎTî yê Almanya bi hawayêkê hîrayî ameyî eşkerakerdene. Bername de ame vatene ke Almanya de 8 hezar kesî seba MÎT xebitîyenê û xebatanê îstîxbaratê tirkan de 900 camîyê pabesteyê DÎTÎBî rolêkê girîngî anê ca.

Bername de ame parekerdene ke nê camîyan de malayê tirkî derheqê muxalîfanê rejîmê Erdoganî de zanayîşan danê konsolosxane û sersefîrîyan û serra 2017î de vera tay malayanê ajanan tehqîqatî ameyî kerdene la dima dosyayî ameyî girewtene. Bername de qala planê suîkastî yê vera Hayko Bagdatî ameye kerdene. Ame vatene ke îxbarê ajanêkê MÎTî ra dima derheqê wekîlê verênî yê HDPyî Turgut Okerî de dewayêke ameye akerdene. 

Almanya destûr dana xebatanê MÎTî

Goreyê pisporanê bernameyî sey Okerî derheqê xeylêk kesanê kurdan de netîceya xebetanê MÎTî yê Almanya de Tirkîya de dewayî ameyî akerdene û înan rê ceza ameye dayene. Pispor û sîyasetmedaranê ke bername de qisey kerdêne, ard ziwan ke dewleta tirke derheqê kesan de ke Almanya de ciwîyenê zanayîşan kom kena û no zî sûc o.

Pisporê îstîxbaratî Erich Schmidt-Eenboomî roportaj da bername û îfade kerd ke MÎT Almanya de rêxistina tewr xurte ya îstîxbaratî ya. Eenboomî bêvengîya Hukmatê Federalî rexne kerde. Erich Schmidt-Eenboomî da zanayene ke Qirkerdişê Parisî yê 9ê çeleyê 2013î de ke tede Sakina Cansiz, Fîdane Dogan û Leyla Şaylemez ameyî qetilkerdene, hetê MÎTî ra ame kerdene.

Erich Schmidt-Eenboomî îfadeyanê berpirsanê MÎTî Erhan Pekçetîn û Aydin Guneyî ser o vindert ke nê kesî 4ê tebaxa 2017î de Başûrê Kurdîstanî de operasyonêkê taybetî yê PKKyî de ameybî tepiştene. Îfadeyê înan ANF de weşanîyabî. Erich Schmidt-Eenboomî da zanayene ke hîyararşîya fermanê înfazî û zanayîşê serebûtî yewbînan tepişenê.

Erich Schmidt-Eenboomî vist vîrî ke îstîxbaratê Fransa û yewinanê asayîşî zanayîşê ke Erdoganî bi xo fermanê sûîkastê Parisî da, dayî dozgerîya Fransa û nê zanayîşî dosyaya cigêrayîşî de ca gênê. Erich Schmidt-Eenboomî pare kerd ke Almanya seba ke serebûtê sey Qirkerdişê Parisî Almanya de nêqewimo Tirkîya hîşyar kerde.

Her di berpirsanê MÎTî dabi zanayene ke bîletê kiştoxê Qirkerdişê Parisî Omer Guneyî hetê şîrketa turîzmî ya MÎTî ra ameybî hêrînayene. Îfadeyanê di ajanan de ke ANF de weşanîyabî hîyerarşîya fermanê înfazî wina amebî deşîfrekerdene. Serekê Dayîreyê Xebetan ê Etnîk û Cîyakeran ê Teberê Welatî Ugur Kaan Ayik, mudirê şubeyê operasyonî yê nê dayîreyî Oguz Yuret, xebatkarê şubeyê operasyonî ayhan Oran û plansazê nê qirkerdişî Sabahattîn Asal.