Komîteya Rayberdişî ya PKK’yî derheqê Kizildereyî de eşkerayîya nuştekîye weşanaye.

Eşkerayîye de nê ameyî parekerdene:  

“47 serrî raver rayberê têgêrayîşê demokratîk ê  şorişgêrî yê Tirkîya Mahîr Çayan û 9 hevalê ey dewa Kizildereyî ya Nîksarî ya Tokatî de ameyî qetilkerdene. Ma înan bi hurmet yad kenê û ma sozê xo yê Tirkîya Demokratîke û Kurdistano Azad tekrar kenê.

Têkoşîno demokratîk û şorişger o ke Mahîr, Denîz, Îbrahîm Kaypakkaya rayberîya ci kerda seba Tirkîya merheleya newe ya. No têkoşîn eynî wext de seba têkoşînê azadîye yê şarê Kurdî zî newe yo. Seba destpêkerdiş û xurtkerdişê xeta têkoşînê Kurdistanî, tesîrê têkoşînê serra 1971’î zaf esto. Rayber Apo sey sempatîzanêkê THKP-C’yî seba ke vera şehadetê Mahîr û hevalê ey wezîfeyê xo bîyaro ca, rayberîye boykotkerdişê wendegehan rê kerde. Ê boykotî Fakulteya Zanîstanê Sîyasî de heme ciwan û wendekaran ser o tesîr kerd. Rayber Apo dimayo ke hepisxane ra vejîya Fakulteya Zanîstanê Sîyasî û Enqere de zî rayberîye rêxistinkerdişê ciwananê şorişgeran ê Enqere rê kerde. Mahîr Çayan û hevalanê ey zî da zanayene ke şorişê demokratîk ê Tirkîya bi hemkarîya cepheyê hempar ê heme bindestan do bieşko bêro viraştene. Cepheyo demokratîk de bêguman cayê Kurdan zaf muhîm o. Mahîr Çayan û Huseyîn Cevahîr seba cepheyê şoriş ê demokratîkî yê Tirkîya têkoşîn kerd.  Azadîya şarê Kurdî zî, amancê bingeyênî yê nê şorişê demokratîkî yo. Rayber Apo û PKK zî wazenê Tirkîya de cepheyê şorişî yê demokratîkî awan bikerê û hesreta nê şehîdan bîyaro ca.

HBDH seba ferasetêkê winayî ame awankerdene û wareyê sîyasî yê demokratîke de zî bi nê hawayî têkoşîno hempar yeno dayene. Weçînayîşê 31’ê Adare de zî şarê Kurdî û hêzê demokrasî bi ferasetê têkoşînê hemparî têgêrayîş kenê. Binkerdişê faşîzmê AKP û MHP’yî yeno manaya caardişê hesreta Mahîr Çayan û hevalanê ey. Bêguman merdim nêeşkeno şorişê demokratîkî bi weçînayîşan sînor bikero. Ma bawer kenê ke şarê ma û heme hêzê demokrasî weçînayîşê 31’ê Adare de vera faşîzmî rolê xo do bîyaro ca.

Serrgêra şehîdbîyayîşê înan de ma reyêna Mahîr Çayan û hevalanê ey ê têkoşînî yad kenê û ma sey  PKK danê zanayene ke seba caardişê hesretanê heme şehîdanê demokrasî, ma sozê xurtkerdişê têkoşînî danê.”