Bajarê Lahrî yê Almanya de polîsan saetanê serê sibayî de eşt Merkezê Komelê Demokratîkî yê Kurdan keyeyanê îdarekaranê ci ser.

Federasyonê Komelanê Kurdîstanijan (FCK-BW-BAYERN) bi eşkerayîyêka nuştekîye hêrişê polîsan şermeza kerd û vat: ''Kurdê ke hêrişê dewleta tirke ra remayî ameyî Almanya, tîya zî raştê zextan yenî. Ganî hukmatê alamanî hinî destê xo pêsîrê kurdan ra bianco.''

Îdarekaranê komele ra Mesut Aslano ke keyeyê ci ame sereştene  vat: ''Semedê tewrbîyayîşê çalakî û aktîvîteyanê 2017-2019î ke beyraqe û flamayê qedexeyî ameyî kiriştene, ra sereştişî ameyî kerdene.  Keyeyî û komele ameyî cigêrayene. Taya keyeyan polîsê taybetî pîya bi kutikan ci girewt. Telefonê ma ameyî girewtene.  Beyraqe û flamayê ke komele de bî ê zî bi seba ke qedexeyî ameyî destsernayene.''

Aslanî bale ante sere ke komeleya înan hetê şaredarî ra ameya tehsîskerdene û vat: ''Polîsan gama ke eşt keyeyê mi ser waşt mi bêrê komele. Avûkatê mi vat meşo. La kîlîtê komelê şaredarî de estbi.  Pê ê kişîtî kewtê zere. Polîsan vat Konsolosxaneyê Tirkîya gerre kerdo û serdozgerîya Karlsruhe talîmatê cipêrsayîşî dayo. Pê talîmatê dewlata tirke hêrişê ma kenê. Cehd kenê ke komeleyanê ma krîmînalîze bikerê. Ma çîyo wînayên qebul nêkenê.''