Cenazeya Ayten Beçet a ke Hepisxaneyê Girewteyî yê Cinîyan ê Gebze de bi armancê şermezarkerdişê tecrîdê serê Rayberê Şarê Kurdî Abdullah Ocalanî çalakîya fedaîye viraştebî, polîsanê Tirkan Stenbol de dest daybî serê cenaze û şawitebî Dîlok. Pîyê Beçete Sabrî Beçet, wexto ke heşar bi ke cenazeya kênaya ci ameya remnayene û berda Dîlok, verê xo da Dîlok. Wexto ke Sabrî Beçet kewt Dîlok polîsanê Tirkan o bi zor girewt û berd Goristanê Yeşîlkent ê Dîlokî. Dimeyo ke ame heşnayene pîyê Beçete Sabrî Beçet bi zor berdo goristanî, parlamenteranê HDP’yî Mahmut Togrul, Ayşe Surucu, Omer Ocalan, Fatma Kurtulane, Ridvan Turan, Tulay Hatîmoglullari, Saliha Aydenîze û Semra Guzele û maya Beçete Fatma Beçete û merdimê ci ver bi goristanî kewtî bi rayîr. Labelê polîsanê Tirkan dorme ra ci girewt û destûr nêda ke parlamenterî û keyeyê Beçete taxe ra bivejîyê û şorê goristan.

Munaqeşeyanê dergan ra dima, polîsanê Tirkan teyna seba keyeyî destûr da ke taxe ra bivejîyê. Parlamenter û merdimê Beçete bi wesayîtanê xo ameyî verê goristanî.

Labelê tîya de zî parlamenterî bi wesayîtanê zirxîyan ê eskeran ameyî astengkerdene û dekewtişê înan ê goristanî ame astengkerdene. Serê israrkerdişê parlamenteran, fermandarê eskeranê Tirkî parlamenteran ra vat ke înan rê ferman ameyo ke nêverdê parlamenterî bikewê goristan, tewrê merasîmî bibê. Maye û pîyê Beçete Fatma û Sabrî Beçet zî mîyan de destûr ame dayene ke grubêka 20 kesan a ke merdiman ê Beçete ra yena pê, bikewê goristan. Merdimî tarîyo ke çim çiman nêvînenê de mecbur mendî ke cenazeye wedarê.

Hetê bînî ra muracatê serdana keyeyî ya seba keyeyê serweşîye hetê Şaredarîya Şahînbey a AKP’î ra ameye redkerdene.