Taksîm de seba 8’ê Adare Roja Cinîyan a Mîyanneteweyîye bi hezaran cinîyî rayraşîyayîşê “Rayraşîyayîşê Şewa Femînîstan a 17’ine” de ameyî têhet, polîsan bi bombayanê gazan hêrişê cinîyan kerd.
Vizêr şan Taksîmê Stenbolî de seba 8’ê Adare Roja Cinîyan a Mîyanneteweyîye bi hezaran cinîyî ameyî têhet. Polîsanê Tirkî roja cinîyan de hêrişê cinîyan kerd.
Rixmê heme astengîyan seba 8’ê Adare Roja Cinîyan a Mîyanneteweyîye bi hezaran cinîyî Taksîm de “Rayraşîyayîşê Şewa Femînîstan a 17’ine” de ameyî têhet, la polîsan hêrişê înan kerd. Bi hezaran kesî saet 19:30 ra tepîya vernîya Merkezê Kulturî yê Fransî de ameyî pêser û rayraşîyayîş de biqerar bîyî, labelê polîsan bi gazê îsotî mudaxeleyê cinîyan kerd. Rixmê mudaxeleyan de zî cinîyan slogan eştî.
Hemverê hêrişî de cinîyan sloganê sey “Ma bêveng nêbenê, ma nêtersenê, ma îtîat nêkenê” û “Bêveng mebe, bi bêvengîye dore yena to zî” eştî û bi çepikan razînêbîyayîşê xo ramotî. Cinîyî kuçeyanê Îstîklalî de vila bîyî û çalakîya xo domnaye.
