Hêriş û qirkerdişê nîjadperestî yê vera kurdan her roje zêdîyenê. Mîyanê mengêke de Afyon, Marmarîs, Manavgat û Konya de hêrişî ameyî kerdene. Tewr peyên 7 ferdê keyeyê Dedeogullariyî ameyî qetilkerdene. Kiştoxê keyeyê Dedeogullariyî 22ê gulane tay kesanê bînan reyde hêrişê keyeyî kerdbi la rixmê delîlan û gerreyê keyeyî amebi veradayene.

Serekê Baroyê Amedî Av. Nîhat Erenî hêriş û qirkerdişê nîjadperestî yê vera kurdan ercnayî.

Nîhat Erenî vist vîrî ke bi taybetî menganê hamnanî de vera karkeranê serrrwextî yê kurdan hêrişê sîstematîkî yenê kerdene û nê hêrişan pê qirkerdişê Denîze Poyraz dest pêkerd.

Avûkat Erenî îfade kerd ke ziwanê sîyasetmedaran hêrişanê nîjadperestan zêdîneno û vat: ''Qirkerdişê Konya de verê serebûtî nêame girewtene. Ma sey baroyan o çax eşkerayîyêke dabi û ma cade ameyî hedefkerdene. Gereka ma 'rehetîya' binê nê qirkerdişî pers bikerê. Eke nê merdimî kurd nêbîyêne no qirkerdiş hende rehet nêameyêne kerdene.  Menga gulane de no keye maruzê hêrişê heman kesan beno la dewlete tedbîrî nêgêna. Dima qirkerdiş yeno kerdene. Ma eşkera kerd ke no kiştox û hêrişkarê bînî merdimê yewbînan ê. Hêzanê asayîşî çira rixme gerreyî tedbîr nêgirewt? Qet yew îstîxbarat nêresayo înan? Ma nê babetan ser o vindenê.''

Erenî pare kerd ke polîtîkaya bêcezaverdayîşî  meseleya tewr pîl a û vat: ''Serebûtanê serranê 90an de ma na polîtîka zaf dîye. Verî na polîtîka têna seba selahîyetdaranê umûmîye ameyêne caardene la nika seba sivîlan zî yena caardene. Îzmîr de kiştoxê Denîze Poyraz rê hetê hêzanê asayîşî nêzdîbîyayîşêko nerm ame mojnayene. A raşte hêzê asayîşî qetî wina nêkenê. Polîtîkaya bêcezaverdayîşê asayîş û mehkemeya dewlete hêrişkeran de cesaret virazena.''

Erenî vist vîrî ke herêmanê şewatî de tay merdimî rayîran gênê, pê çekanê giranan nasnameyê merdiman kontrol kenê. Erenî vat: ''Nê şewatan de hêrişê nîjadperestî zêdîyayî. Merdimê pê tifinganê bipompayan rayîran gênê, plakaya wesayîtan ser o merdiman etîket kenê. Ganî îqtîdar û temsîlkarê partîyan ê bînan na babete de qisey bikerê, verê nê kerdişan bigêrê. Çunke ê dîmenî yew dewleta huqûqî de qetî nêqewimîyenê.''