Riha de DEDAŞ bi hawayêkê sîstematîkî vera citkaran binê nameyê deynê ceyranî de zulm keno. DEDAŞ vera ceyran û awa citkaran birneno. Wekîla Partîya Çep a Keske ya Riha Dîlane Kunt Ayan derheqê teda û zulmê DEDAŞî de ANFyî rê qisey kerd.

Wekîle Dîlane Kunt Ayan da zanayene ke îqtîdarê AKP-MHPyî DEDAŞ rotbi şîrketanê taybetan rixmê ney zî DEDAŞ seke aîdê dewlete yo têgêreno û  şarî rê zulm keno. Dîlane vat: ''AKP seba ke zîret biqedo, citkarî herême biteriknê nê polîtîkayan ano ca. A raşte weçînayîşan ra verî AKP-MHPyî bi rayîrê Bekîr Bozdagî soz dabi ke verê zulmê DEDAŞî bigêro la sozê xo nêard ca. DEDAŞ şarî rê gefê 'ez do ceyranê şima bibirna' waneno. Reyna xeylêk citkarî seba ke DEDAŞ protesto kerdo ameyî destbendkerdene û mîyanê înan de weçînitoxê AKPyî zî est ê. Ê bi xo vanê ke Bozdagî soz dayo înan. Ganî bizanîyo ke DEDAŞ îqtîdarî ra bêxebere nê çîyan nêkeno. 

Ma sey Partîya Çep a Keske kenê ke çareserîyêke bivînê. Ma Odaya Zîretî de pêvînayîş kerd û înan rê pêşnîyaz kerd ke wa DEDAŞ bibo ê umûmîye. Odaya Zîretî zî wina fikirîyena. Reyna sey ney alternatîfê bînî zî est ê. La îqtîdar bi xo nêwazeno ke na mesele çareser bikero. Na mesele teyna meseleya citkaranê herême zî nîya. Çunke berhemê nê citkaran resenê pêro welatî. Îqtîdar teyna rantî xo rê keno mesele. Ma sey Partîya Çep a Keske vera ney de yê. Hişmendîya ke wextêk ziwan, kultur û aktîvîteyê merdiman qedexe kerdbî nika zî zîretî qedexe kena. Ma do heta peynî ney bîyarê ziwan.''