Pisporê huqûqê mîyanneteweyîye Prof. Norman Paech ard ziwan ke tecrîdo girankerde yo ke dewleta Tirkî Ocalanî ser o dana domnayene qet goreyê erjê merdimîye nêyo. Prof. Paecho ke ANFyî rê qisey kerd vat ke bêvengîya dewletanê Ewropa zî nêna qebûlkerdene.
Merdimê îlîmî yê Almanî Prof. Norman Paecho pisporê huqûqê mîyanneteweyîye yê naskerdeyan ra yew o. Prof. Paecho ke şaristanê Hamburgî de ronişeno heman wextî de halê Rayberê Şarê Kurdî Abdullah ocalanî û qewimîyayişanê Kurdistanî zî nêzdî ra taqîp keno.
Prof. Paechî tecrîdê serê Ocalanî, hemsereka KCDyî Leyla Guvena ke halê ci krîtîk o, çalakîya grevê vêşanîye û hêrişê Erdoganî yê vera Rojawanî ANFyî rê ercnayî.
AŞITÎYE TENA BI AZADÎYE OCALANÎ BENA
Prof. Paechî şero ke dewleta Tirkî Kurdistan de dana domnayene vist vîrî û va: ‘‘No şerê de heme heqê merdiman yenî binpaykerdene. Tena Ocalan eşkeno ke vernîya nê şerî bigêro û şaranê herême rê aşitî bîyaro. No zî bi azadkerdişê Ocalanî mumkun o. Azadkerdişê Ocalanî tena seba Tirkîye nê, Rojakewtena mîyanêne de zî do vernîya bîyayîşanê pozîtîfan ê tarîxî abikero. Gama ke mi Ocalan dir pêdîyayîş viraşt, ez bi xo hêz û tesîrê ey re bîya şahîd.‘‘
Prof. Paechî pêdîyayîşo ke Ocalan dir serra 1995î de paytextê Surîye Şam de viraşt ard vîrî û wina dewam kerd: ‘‘Ocalan sey nika o wext zî aşitî û halkerdişo sîyasîyî ra qisey kerdêne. Mi o pêdîyayîş ra dima ferq kerd ke Ocalan kesanê tewr bitesîrî yê Rojakewtena mîyanêne ra yew o. Ocalanî heta ewro tesîrê xo bina vîn nêkerd û sey verî domneno.‘‘
ÎMRALI DE PÊKERDIŞÊ MÎYANNETEWYÎYE YENÎ BINPAYKERDENE
Prof. Paechî bale ante ke Ocalan heman wextî de mîyanê Têgêrayîşê Azadîye yê Kurdan de zî wayîrê rolêko merkezî yo û best pa: ‘‘Ocalan dir dîyalog do şaran rê aşitî û çareserî bîyaro. La rixmê muhîmîya rolê Ocalanî destûr nêdîyeno ke merdimanê xo zî bivîno. Her çî ya verê tecrîdkerdişê Ocalanî teberê merdimîye yo û qet goreyê erjê Ewropa nêyo. Goreyê huqûqê mîyanneteweyîye, bi tecrîdkerdişê Ocalanî Tirkîye pêkerdişê ke îmza kerdî înan binpay kena. Verva naye bêvengîya dewletanê Ewropa zî nêna qebûlkerdene. Seba qedînayîşê na bêhuqûqîye ganî sere de hukmatê Almanî welatê Ewropa tê bigêrî.‘‘
ÇALAKÎYA LEYLA GUVENÊ MUHÎM A
Prof. Paechî çalakîya grêvê vêşanîye yê bêdem- bêagêrayîşî yê Leyla Guvene ke kewta roja xo ya 65ine û ê embazanê aye zaf muhîm name kerde û vat ke ez nêpawena ke bi grevê vêşanîye tecrîd bêro wedarnayene û umîd kena ke halê înan zaf xirab mebo.‘‘
Prof. Paechî vatişê îdareyê Berlînî yê ‘‘Ma nêwazenê ke dewleta Tirkî herra Surîye rê leşkerî mudaxale bikero‘‘ zî wina ercna: ‘‘Waştişê mi o ke hukmatê Almanî peynîya no vatişê xo de vindero. Ganî sere de Almanya welatê bînî zî vera sîyasetê hêrişkarî yê Erdoganî de tewirê xo ramojnî. Seba vernî girewtişê hêrişê Rojawanî, ganî hêzê mîyanneteweyîye û welatê rojawanî îktîdarê Erdoganî rê zext bikerê. Ganî Erdogan hinî fam bikero ke hêrişkerdişê herra yewna welatî binpaykerdişê huqûqê mîyanneteweyîye yo. Tîya de rolêko muhîm ê Almanya yo. Ganî Almanya eşkerayîye ka daya bi naye sinordar memano û pratîk de bica bîyaro. Almanya ganî Kurdan û Tirkan rê seypê nêzdî bibo.‘‘
PROF. NORMAN PAECH KAM O?
Prof. Norman Paech serra 1938î de şaristanê Bremerhavenî yê Almanya de ame dinya. Unîversîteyanê Tubingen, Munchen û Parîsî de perwrdeyê huqûqî û îlmê sîyasetî girewt. Prof. Paech mabênê serranê 1975-1982î de Fakulteya Huqûqî ya Unîversîteya Hambûrgî de profesorîye kerde. 1982 ra heta 2003î unîversîte de dersê sîyaset û ekonomî da. Paecho ke mabênê serranê 1977-1986 î de serekîya Yewîya Huqûqkaranê Demokratan kerd, mabênê serranê 2005-2009î de zî endamê Meclîsê Fedaralî bi û nê demî de Partîya Çepî de vervatoxîya karê teberî kerde.