Qers de Kurdî, Lazî, Terekemeyî, Azerîyî pîya ciwîyenê. Şarê bajarî îdareyê bajarî yo ke destê AKP-MHP’yî de yo ra bîyê aciz û wazenê ke 31’ê Adare de peynîya nê îdareyî bêro.

Namzedê HDP’yî Ayhan Bîlgenî qiseykerdişê xo de va Qers de AKP- MHP’yî îtîfaq nayo ro, la şarê Qersî do reyanê xo nêdo ci.

MA DO ŞAREDARÎYA ŞEFAFE AWAN BIKERÊ

Bîlgenî wina qisey kerd: ”Qers de şarê cîya-cîyayî pîya ciwîyenê û herême sey mozaîkê şaran a. Qers de îdareyê ewroyî bi ziwanê cîyakarîye qisey keno û şaran yewbînan rê keno dişmen û hesab nêdano şarî. Şarê Qersî, her çiqas ke îtîfaq binê ro zî reyanê xo do nêdo înan. Çunke îdareyo şefaf çin o, hesab nêdano şarî. Şaro Kurd do reyanê xo bido HDP’yî û şarê bînî zî êdî sey verî nîyê û rastîye vînenê. Ferasetê îdareyê nîkayî yo “ welat, milet, Sakarya” do sindoqan de bibo binkewte.”

MODELÊ HEMSEREKÎYE CINÎYAN RÊ RAYÎR AKERDO

Namzeda hemserekîye ya Şaredarîya Qersî Şevîn Alacaye zî va HDP’yî bi modelê hemserekîye, cinîyan rê rayîr akerdo û wina dewam kerd: “No model, seba temsîlîyetê cinîyan zaf muhîm o. Cinîyî bi sîstemê hemserekîye bîyî wayîrê soz û qerarî. Bajarê ma de şarê Kurd, Terekeme, Azerî, Laz, Tirk û cîya-cîyayî estê. Ez bi xo zî hem Kurd, hem zî Azerî ya û ez zî parçeyê mozaîkê Qersî ya. Şaredarîye de, xizmetdayîş de, ma do sîyasetê nasnameyî nêkerê. Ma do seba pêroyê şaran xizmet bikê. Bi taybetî zî cinîyî eleqeyêkê zaf pîlî musnenê mi. Çunke şaredarîye de yew cinîye do înan de bibo muxatab.”