Hemşaredara Ebexî Leyla Balkan Atsaka ke herinda ci de qeyûm amebi tayînkerdene nê verweçînayîşanê DEM Partî de di qezayanê Wanî de wezîfedar bîye. Leyla Balkan Atsak derheqê rejîmê qeyûman û verweçînayîşanê DEM Partî de ANFyî rê qisey kerd.

Leyla Balkan Atsak pare kerd e 2017 de bi KHKyan a karmendîye ra amebî vetene la wexto ke 2019 de seba hemşaredarîye muracatê YSKyî kerdbî ameya tesdîqkerdene. Leyla vat: ''6 şaredarîyanê ma rê bi bahaneya KHKyan qeyûmî ameyî tayînkerdene. Cara Ebex destê qeyûmî de bi. Dima ma ameyî weçînayene la dima herinda ma de zî qeyûm ame tayînkerdene. Şarî zî na rewşe sey zulmî pênase kerde. Merdiman seba ke qeyûmî ra bixelisê raya xo daye ma. La şar nêvenao ke 'cara qeyûm do bêro, ma raye nêdê.' Şar tim îradeyê xo kirişeno sindoqan. Şarê ma qetî ma teyna nêverdeno.''

Leyla da zanayene ke dima ke herinda ci de qeyûm ame tayînkerdene zî aye xebatanê partîye rê dewam kerd û vat: ''Hetê şexsî ra tayînê qeyûmî tesîrê mi nêkerd û do nêkero. No yew têkoşînê şarî yo. Xoverdayîş û kelecanê şarî ez hêvîdar kerda. Ma nêvat ke her çi qedîyayo û ma do wina nêvajê. Qeyûmo ke herinda mi de ameyo tayînkerdene Ebexî ra yo û namzetê AKPyî bi. Qeyûm şoro kamca şarê ma bi têgêrayîşê xo mojneno ke o neheqîye ra ameyo pozîsyonê xo ser.Qeyûmî di serran de şaredarîye vurnaya şîrkeya keyeyî. Pêro ferdê keyeyê ey şaredarîye de ameyî wezîfedarkerdene. Yanî qeyûm seba xo xebitîya.''

Leyla bale ante verweçînayîşanê DEM Partî ser û vat: ''Verweçînayîşanê DEM Partî şar de kelecanêko pîl viraşt. Ez verweçînayîşanê Ebex û Qereyazî de erkdar bîya. Şar bi kelecanî ame sindoqan ser. Pîyaîdarekerdiş hêvî dano merdimî. Awankerdişê ameyoxê demokratîkî no yo. Ma nika bi DEM Partî kewenê weçînayîşan. Derdê îqtîdarî hema zî tayînê qeyûman o. Heyf ke ma nêeşkenê vajê ke weçînayîşî do bi hawayêkê demokratîkî do bêrê kerdene. Qetî îqtîdar do ancî xesp û xîleyan bikero. La do nêeşkeno îradeyê ma bişikno.''