10ê teşrîna verêne ya 2015î de DAÎŞ Anqara de pê bombayan hêrişê nawnayîşê HDPyî kerdbi û 103 kesî qetilkerdbi.  Komeleya Paştdayîş û Haştîye ya 10ê Teşrîna Verêne cayê qirkerdişî Gar de merasîmêkê yadkerdişî kerd.

Sereka Komele Mehtape Sakîncî Coşkun da zanayene ke 5 serrî yo dewlete sûcdarî nêtepiştî û dewaya qirkerdişî de keyeyanê qurbanan rê gefî yenê wendene.

Coşkune vat: ''No tarîxê komare de qirkerdişo tewr pîl o la hema zî edalet nêame caardene. Ma do heta peynî salona roniştişê dewa pirr bikerê û waştişê edaletî dibare bikerê.''

Hetê bînî ra ewro roniştişê dewaya verguman Erman Ekîcîyî Mehkemeya Cezaya Girane ya Anqara de ame kerdene. Wekîlê HDPyî û xeylêk avûkatî tewrê roniştişî bîyî.

Heyetê mehkeme erey ame salona roniştişî. Wexto ke şahîde Buşra Şahîn qisey kerdêne mudaxeleyê avûkatê Ekîcîyî ra semed mabênê keyeyan û heyetê mehkeme de nîqaş qewimîya. Serekê mehkeme xîret kerd ke keyeyan salone ra vejo la keyeyan vat: ''Ma edalet wazenê. Şima înan nê ma muhakeme kenê.''

Serekê mehkeme roniştiş vindarna û salone teriknaye û badê deqeyan  agêra salone.  Wekîlan zî vera tewirê ey nêrazîbîyayîş ramojna. Wekîla HDPyî ya Anqara Fîlîze Kerestecîoglu ard ziwan ke a avûta 35 serran a hema çirey wina muhakemekerdiş nêdîyo.

Serekê mehkeme rixmê heme vervejîyayîşan roniştiş 19ê adare rê pey de eşt. Êyê ke salone de bî pê pirodayîşê masayan û çepikan tewirê heyetê mehkeme şermezar kerd. Badê roniştişî keyeyan verê edlîye de eşkerayîye daye û nêrazibîyayîşê xo ard ziwan. Keyeyî bi slogana 'Rojêke do qetilkarî hesab bidê' vila bîyî.