Qirkerdişê Gazî ke 22 kesî ameyî qetilkerdene û bi seyan kesî birîndar bîyî serrgêra ci ya 26. de bi rayraşîyayîşêk ame şermezarkerdene.

Bi vengdayîşê Hêzanê Mucadeyê Yewbîyayeyî û Platformê 12ê Adare bi hezran kesî verê Cemxaneyê Gazî de ameyî têhet û binê ablûqaya polîsan de ver bi qeraqolî rayraşîyayîş kerd. Çalakîye de kesê ke ameyî qetilkerdene fotografê înan ameyî kiriştene û bi sloganan waştişê hesabpersayîşî ardîya ziwan. Wesayîtanê zirxinan û TOMAyan zî çalakwanî teqîp kerdî. Verê PTTyê verênî ke cayê qirkerdişî yo de vilîkî ameyî ronayene û dima ra eşkerayîyêke ameye dayene.

Bi nameyê Platformê 12ê Adare birayê Dîleke Şîmşek Erkan Şîmşekî qisey kerd. Şîmşekî vat: ''No qirkerdiş vera heme şaran bi. Qetilkaran eşkera destê xo têşayî û binate ra vînî bîyî. La hersê Gazî her serre kuçeyan de ser şi. Tîya bi desan kesî ameyî qetilkerdene û bi seyan kesî birîndar bîyî. Qirkerdiş wina eşkera bi la qetilkarî nêameyî cezakerdene. Îqtîdar nê  şar do cezaya qetilkaran bido.''

Şîmşekî bale ante ser ke heta persayîşê hesabî do cigêrayîşê edaletî yê înan dewam bikero û vat: ''Ewro bi desan rojnameger û sîyasetmedarî seba ke vera zulmî xover dayo zîndanan de yê. Vera tecrîdî grevê tepişteyan dewam keno. No xoverdayîş anor o. Xoverdayîş kewt roja 106. Rixmê qeraranê Mehkemeya Heqanê Merdiman a Ewropa sîyasetmedarî bîlasebeb zîndan de yenê tepiştene. Kedkarî sey terorîst yenê namekerdene. Welat de problemê beka çîn o, îqtîdar semedê welatî  bîyo problemê beka.''

Dima şar Goristanê Gazî de êyê ke ameyî qetilkerdene serê goranê înan de yad kerdî.