Netîceya polîtîkaya înkar û îmhayî îqtîdarî de hêrişê vera kurdan her hetî ra zêdîyenê. Nasname, ziwan û kulturê kurdan hedefê hêrişanê nîjadperestan de yê. Kurdî seba ke kurdkî qisey kenê ya zî têna kurdê her roje raştê hêrişanê nîjasperestan yenê, yenê destbendkerdene û tepiştene. Qurbananê nê hêrişan ra yew zî Keyeyî Dedeogullariyî yo.

Qezaya Meramî ya Konya de 30ê temmeza 2021î de netîceya hêrişê nîjadperestî de Keyeyê Dedeogullarîyî ra 4ê înan cinîyî 7 kesî ameyî qetilkerdene. Badê qirkerdişî kiştox Mehmet Altun ame tepiştene. Qirkerdişo ke pê destê keyeyê Altun û Keleşî binê çimdarîya dewlete de ame kerdene serrêke xo dima verda la hema dewa de averşîyayîşêk nêbîyo. Rixmê heme delîlan kiştoxî hetê dewlete ra yenê pawitene.

Keyeyê Dedeogullariyo ke 25 serrî verî Qersî ra bare kerd û şîyo Meram tîya citakrîya kerde û heta 2010 cîrananê xo reyde bê problemî ciwîyayî.Çetîn Dedeogullariyo ke qirkerdişî ra têna û weş mend wina vat: ''Yew roje hela ke babîyê mi rehmetî Yaşar pîya bi Lutfî Keleşo ke hêgayê ma têkişt de yê, çay şimeno Keleş kurdan rê nengan çîneno û babîyê mi hêrs beno. Mabênê înan de pêrodayîş vejîyeno la babete tîya qefilyena. Dima ra 12ê gulana 2021î de keyeyê Keleşî bîlasebeb hêrişê keyeyê ma keno û birayê mi Metîn bi giranî û ferdê keyeyî yê bînî birîndar benê.''

Keyeyê Dedeogullarî îfadeyê xo yê polîsan de vano ê raştê hêrişê nîjadperestî ameyî û eke verê ci nêro girewtene beno ke rewşe xirabêr biba. Keyeyê Dedeogullar xeylêk rey muracatê dezgehanê dewlete yê eleqedarn keno û vano ê tehlukeyê girdî de rî bi rî yê. Rixmê nê muracatan tedbîrî nînê girewtene û dewlete goş vatişanê keyeyî nêkewna.

Kiştox Mehmet Altuno ke eşt keyeyê Dedeogullarîyî ser û 7 kesî qetil kerdî qikrediş verî ra plan kerdo paştdayîşê fînanskîyî girewto. Prosesê dewa de ame îspatkerdene ke kiştox Altun qirkerdiş xo ser têna nêkerdo. Kiştox Altunî bi xo vat o verê hêrişî şîyo Eskişehir, Anqara, Îstanbul û Bursa tîya otêlanê vayan de mendo. Xora kiştox hela ke şibi keyeyê Dedeogullarîyî benzîn û çeke tewrê xo de berdbî. No zî mojenano ke qirkerdişê verî ra ameyo plankerdene. Velî Keleşo ke hêrişê vera Keyeyê Dedeogullarîyî yê  12ê gulana 2021î ca girewtbi Erdoganî ra hetkarî waştbi.

Avaûkatanê Keyeyê Dedeogullarîyî ra Atîlla Kart vatbi: Kiştox Mehmet Altun verê qirkerdişî kampa moralî de mendo. Goreyê zanayîş û belgeyanê ke kewtê destê ma Altunî ra vajîyayo 'ma ewnîyenê keyeyê to ra.' Eşkera yo ke Altun sey kiştoxê profesyonolî ameyo amadekerdene. Kiştox gama ke yeno keyeyê Dedeogullarîyî Bariş keye de nîyo. O vindeno Barişî paweno. Tam 10-12 deqeyî kesanê bînan de qisey keno. Qeydê nê est ê la asayîş nê delîlan ser zaf nêvindet.''

Dîmenanê qirkerdişî de dîmenê di deqayan çîn ê. Reyna kiştox hende 35 deqayan qisey keno la raporê nê zî yeno vînîkerdene. 60 pelan ra têna yew pel dosya de yeno vîrakerdene. No mojeneno ke hêriş senî organîzekerde ameyo  kerdene. Nê qeydî qey ameyî nimitene, kiştoxî kamî de bazarîye kerde cebanê înan hema nînê zanayene. Kiştox uca vano ez do 5 kesanê bînan bikişî dima ra teslîm bibê. Bi nê vatişî îtarf keno ke qirkerdiş kerdo. Çunke qisawet keno ke hemkarîya waya ci Ayşe bêro eşkerakerdene. Altun bado ke yeno tepiştene pêvînayîşê telefonî de cinîyan xo ra vano keyfê ey cade yo, o hol yeno miqatbîyayene. Reyna cinîya kiştoxî rê hetkarî yena kerdene, hende pere yeno pêser ke a eşkena ban bierno. Pê belgeyan ame tesbîtkerdene heme keyeyê Altunî mîyanê no qirkerdiş tesdîq kerdo.