19-26ê Kanûne de Mereş de goreyê reqamanê fermîyan 111 kesî merdî, bi seyan kesî birîndar bî. 210 keyeyî û 70 kargehî ameyî tehrîbkerdene. Dozgerî hûmara berbirsîyaranê qirkerdişî sey hezar û 350 dabî, nînan ra derheqê 840 kesan de dewa amî akerdene. Muhakemeyo ke 23 serrî dewam kerd ra dima seba 29 kesan îdam, 7 kesan hepiso muebbet û 357 kesan zî cezayê mabênê 1-24 serrî dîyayî. 379 versûcan berat kerd. Dewrê serekkomarîya Ozalî de 1991 de bi Qanûnê Mucadeleyê Hemverê Terorî (TMK) înfazê cezayan fînîya 8 serrî û êyê ke ceza girewtîbî serbest ameyî veradayene.  

68 berpirsîyarê raştekînî yê qirkerdişî ke kiştişan de ca girewtîbî qe nêameyî dîyene. Bi nê hawayî dosyaya Qirkerdişê Mereşî amî girewtene. Avûkatê mudaxilî yê qirkerdişî Ceyhun Can 10ê Êlule 1979 de, Halîl Sitki Gulluoglu Şibata 1980 de û Ahmet Albay zî 3ê Gulane 1980 de ameyî kiştene.

Çîyê ke Mereş de ameyî ciwîyayene eke tenya sey qirkerdişêkê bajarî yan zî mehlayanê ci bêro ercnayene do kemasî virazîyo. Dewro ke planê qirkerdişî ameyêne viraştene bajaranê sey Meletî, Sêwas, Erzingan û Elezîz de ke perçeyê coxrafyaya Kurdanê Elewîyan ê, hêrişê bisîlehî û bibombayî ameyî kerdene.

11ê Hezîrane 1967 de Elbîstan de, 5ê Adare 1971 de Kirikhan de, 17ê Nîsane 1978 de Meletî de, 4ê Êlule 1978 de Sêwas de û 19-26ê Kanûne de zî Mereş de qirkerdişî ameyî kerdene. Mabênê tarîxanê 27ê Gulane û 4ê Temmuze 1980 de zî sey dewamê ê qirkerdişan Çorum de qirkerdiş ame kerdene.   

Rixmo ke serê qirkerdişê Mereşî ra 40 serrî vîyartî û dewa hetê fermî ra amîya girewtene zî dewaya Qirkerdişê Mereşî dewam kena û hewna nêqedîyaya. Dewlete sey vizêrî ewro zî Mereş de polîtîkayanê taybetan fînena dewre.