Xeylêk şaristananê Ewropa  de Qirkerdişê Parisî yê 23yê Kanûne bi çalakîyan ame protestokerdene.

Şaristanê Hamburgî yê Almanya de hetê Meclîsê Cinîyan ê Rojbîne û Meclîsê Şarî yê Hamburgî ra çalakîyêke ameye organîzekerdene. Çalakîye de fotografê şehîdanê Parisî û pankertê "Wut und Trauer zu Widerstand!", "Hêrs û Şîn bi Berxwedan”, “Ihr Kampf ist unser Kampf! Tekoşîna we tekoşîna me ye!” ameyî kiriştene.

Şaristanê Rennesî yê Fransa de çalakîye de vilawekî ameyî vilakerdene û dima bi beşdarîya xeylêk dezgehanê Fransa rayraşîyayîşêk ame kerdene. Çalakîye de fotografê şehîdanê qirkerdişî ameyî akerdene. 

Şaristanê Lorientî yê Fransa de heta saetanê şewe çalakîye ameye kerdene. Çalakîye de fotografê şehîdanê Qirkerdişê Parisî yê 9ê Çeleyê 2013î û 23yê Kanûne Emîne Kara (Evîne Goyî), Mîr Perwer (M. Şirîn Aydin), Abdûrrahman Kizil û Sakîne Cansiz (Sara), Fîdane Dogan (Rojbîne) û Leyla Şaylemez (Ronahî) ameyî akerdene. Girseyî çalakîye de vera sloganê sey “Şehîd namirin”, “Bijî Serok Apo” û “Jin jiyan azadî” vatî.

Şaristanê Montpellierî yê Fransa de bi sloganê 'Kiştox Erdogan' çalakîyêke ameye kerdene û eşkerayîyêke ameye dayene. Eşkerayîye de ame waştene ke wa qirkerdiş bêro roşnîkerdene û Fransa wa rejîmê Erdoganî hînî mepawa.

Şaristanê Almavîrî yê Armenîstanî de çalakîye de dîya zanayene ke Qirkerdişê Parisî hetê dewleta tirke ra ameyê plankerdene û ganî dewleta Fransa nê qirkerdişan roşnî bikerê. Çalakîye bi sloganan qedîyaye.

Paytextê Fînlandîya Helsinki de hetê NCDK, PJAK, KJAR, û Komele-Rêxistina Kurdistanî ya Îranî ra çalakîyêke ameye kerdene. Çalakîye de tewirê Fransa ame protestokerdene û ame vatene ke peyê nê qirkerdişî de dewleta tirke est a.

Paytextê Avusturya Viyana de  bi merasîmêkî Evîne Goyî, Mîr Perwer û Abdurrahman Kizil ameyî yadkerdene. Qiseykerdişan de ame vatene ke wa Fransa hesabê nê qirkerdişan bida. Merasîm bi sloganê 'Şehîdî nêmirenî' qedîya.