33 roşnvîrê ke 2ê temmuza 19993yî de Otêla Madimakî ya Sêwasî de ameyî qetilkerdene, serrgêra 31. ya qirkerdişî de ameyî vîrardene. Serkêşîya Komeleya Kulturî ya Pir Sultan Abadalî û Federasyonê Elewî Bektaşî  (ABF) de bi hezaran kesî ameyî têhet û verê Komeleyanê Haci Bektaş Velî de dest pê rayraşîyayîşî kerd.

Rayraşîyayîş de yo ke ver bi Otêla Madimakî ame kerdene fotografê kesanê ke ameyî qetilkerdene ameyî kiriştene sloganê sey Kiştoxê Sêwasî ronayoxê AKPyî yê, Ganî vêşayî, sûcdarî ça de yê? ameyî vatene.

Hemserekê Pêroyî yê DBPyî Çîgdeme Kiliçgun Uçar û Keskîn Bayindir, Heserekê Pêroyî yê DEM Partî Tuncer Bakirhan , Serekê Pêroyî yê CHPyî Ozgur Ozel û xeylêk sîyasetmedarê bînî û temsîlkarê rêxistinanê komelê sîvîlî tewrê rayraşîyayîşî bîyî.

Badê rayraşîyaîşî berê Otêla Madimakî de eşkerayîye ameye dayene. Tuncer Bakirhanî ke tîya qisey kerd Qirkerdişê Madimakî sey sûcê vera merdimîye name kerd û vat: Ma sey DEM Partî sey vizrî ewro zî dewaya hemwelatîyanê xo yê elewîyan û heme şaranê bindestan ê ke raştê qirkerdişan ameyî, teqîp kenê, pîya têkoşîn kenê. Rojêke na herre de do hesabê qirkerdişan bêro persayene û sûcdarî bêrê cezakerdene. Ma reyna dejê şarê xo yê elewîyî pare kenê û vanê ma do tim paştî bidê têkoşînê înan.

Çîgdeme Kiliçgun Uçar zî ard ziwan ke qirkerdiş bi destê dewlete ame kerdene û vat: Zîhnîyetê nê qirkerdişî 31 serrî yo dewam keno. Dewaya qirkerdişî 30 serrî kerd derg û qetilkarî nêameyî cezakerdene. Îqtîdar bi nê qerarî verê qirkerdişê vera elewîyan akerd.Kursîyê kiştoxî yo ke 31 serrî yo veng o, nika îqtîdar tede nuşeno ro.

Reyna qiseykerdoxanê bînan zî ard ziwan ke qirkerdiş bi destê dewlete ame kerdene û îqtîdar kiştoxan paweno.''