Komeleya Heqanê Merdiman (ÎHD) û Platform Xoser yê Teqîpkerdişê Weçînitişî derheqê weçînitişî de raporê xo yê çimdarîye yê mabênî pare kerd. Rapor de derheqê binpaykerdişê heqan ê herêmanê weçînitişî de nê ameyî vatene:
 
"Dewa Eskîtaşî ya Kolîka ya Semsûrî de serekê AKPyî yê Semsûrî û birayanê ci bi asayîşê leşkeran dewe de rayê xo eşkera şuxulnayî.

Amed de nêzdê 200 kesan seba ke bêxebera înan bîyî endamê heyetê sindoqî nêeşkayî raye bişuxulnê. Seba ke belgeyê bi kodê 142 yê ke semedê endemanê heyetê sindoqî hewce kenê, çînêbî, nêeşkayî raya xo bişuxulnê.

Dîlok de goreyê îdîayan 4 hezar û 84 kesî bêzanayîşê înan sey muşahîtê Partîya Vatanî ameyî nuştene û seba ke sindoqê ke muşahîtê ci yê înan ra zaf dûrî û belgeyê înan çînêbî nêeşkayî raya xo bişuxulnê.

Giresun de yeno îdîakerden eke pusulayê Tayyip Erdoganî verî ra ameyî morkerdene.

Qezaya Fatîhî ya Îstanbul de muşahîtanê AKPyî endamê TÎPî derb kerdî.

Dewa Eşme ya Qoserê Mêrdînî de merdimanê namzedê AKPyî Faruk Kiliçî waşt komkerde rayan bişuxulnê. Muşahîtê Partîya Çep a Keske vera nê vejîyayî. Merdimanê Kiliçî hêrişê muşahîtanê Çep a Keske kerd. Netîceya hêrişî de Havas Gungor û Kemal Erbey birîndar bîyî.

Dewa Alacali ya Harranê Riha de camêrdan vera cinîyan raye şuxulnaye. Sêwereg de zî mektebê Çinhîsarî de rayê eşkerayî ameyî şuxulnayene.