Komîsyonê Tehqîqatî yê Sûrîye yê Neteweyanê Yewbîyayeyan (NY) tarîxê mabênê 1ê çeleyî-30ê hezîrana 2024î ser o raporêkê Sûrîye amade kerd. Rapor do Roniştişanê Heqanê Merdiman a NYyî de bêro pêşkêşkerdene.

Komîsyonî rapor de pare kerd ke dewleta tirke Rojawanê Kurdîstanî de cayê sivîlan kena hedef. Komîsyonî îfade kerd ke nê hêrişî çarçewa sûcanê şerî de yê. Rapor de dîya zanayene ke Rojawan de bêhuqûqîyî vilayê her cayî bîyê û vat: ''Rojawan de tepişîyayîşê keyfîyî, îşkence, vinîkerdişî, nezaret de vinîkerdişî û kiştişî û bi zorî koçkerdişî dewam kenê.''

Rapor de bi zelalî ame vatene ke herême de hêrişê DAÎŞî zî zêdîyayê.

Rapor de wina ame vatenme: ''Artêşa Sûrîye ya Millî (OSO), Tugayê Sultan Suleymanî û Tumenê Sultan Muradî kerdişanê sey şîdet, xesp, tepiştişî rê dewam kenê. OSOyî kesê ke Rojawanî ra yenê bi hawayêkê keyfî û bi sûcdarîya têkilîya QSDyî tepiştî.

Herêmanê binê îşxalê dewleta tirke yê sey Efrîn, Cindirês, Serêkanîyê de îşkenceyî ameyî raporkerdene. ''

Ancî rapor de ame pêhesnayene ke mabênê 2018-2022yî de merkezanê destbendkerdişî yê OSOyî de şîdetê cînselî zî ameyê kerdene û belgekerdene. Rapor de bale ameye antene ser ke herêmanê îşxalkerdeyan de tayê tepişteyî raşta raşte hetê MÎTî ra ameyê cipersayene.

Rapor de ame parekerdene ke dewleta tirke herêmê Îdareyê Xoserî yê Rojawanê Kurdîstanî û warê sivîlî tim kerdê hedef, binawanîya herême kerda hedef. Rapor de ame vîrvistene ke nê hêrişan de doman û cinîyî zî tede xeylêk sivîlan dinyaya xo bedilnaya.

Rapor de ame vatene ke hêrişê dewleta tirke yê 15ê çeleyî, 25ê kanûna 2023yî û 31ê gulane raşta raşte vera sivîlan bîyê û nê hêrişî çarçewa sûcanê şerî de yê.