Ewro bi şîarê 'Vera komployî ma xo ver danê, seba azadîye Amed de yenê têhet' mîtîng est o. Xeylê şaristanan ra şar ver bi Amedî şino. Polîsî bi hawayêkê sîstematîkî şarî asteng kenê.

Vera astengîyan xoverdayîş dewam keno.

Şar Semtê Ofîsî de kom bi.

Hemsereka Pêroyî ya DBPyî Çîgdeme Kiliçgun Uçar tîya de qisey kerd û vat: ''Meseleya kurdan parçekerdişê nasnameyê kurdan o, meseleya azadnêbîyayîşê kurdan o. Meseleya çareserîya demokratîke de muxatab Abdullah Ocalan o. Wa çew projeyanê Ocalanî ra nêterso. Ganî tecrîd biqedo, berê Îmraliyî abibê. Wa qiseyê Abdullah Ocalanî bêrê eşnawitene. Rayîrê azadîya şaranê kurdan û Tirkîya Îmraliyî ra, Abdullah Ocalanî ra derbaz beno.''

Dima bi beşdarîya bi hezaran kesan eşkerayîye ameye dayene. Avûkatanê Buroyê Huqûqî yê Asrînî ra Rêzan Saricayî eşkerayîye wende û vist vîrî ke Ocalanî ra xeberêke nêna girewtene. Saricayî vat: ''Ocalanî pêvînayîşê peyênî de vatbi ke o seba çareserîya meseleya kurdan amade yo. Çareserîya meseleya kurdan û azadîya Ocalanî do verê ameyoxê şaran abikera.''