Serkêşîya Platformê Dezgehanê Demokratîkan de, çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de Rayraşîyayîşê Azadîye û Çareserîya Demokratîke Amedî ra resa Anqara. 

Hemserekê DBPyî Çîgdeme Kiliçgun Uçar û Keskîn Bayindir zî tede raywanî verê Meclîsî de kom bîyî. Hemserekê DEM Partî Tuncer Bakirhan û Tulaye Hatîmogullari, wekîlî tewrê raywanan bîyî. 

Verê Meclîsî de hetê Çîgdeme Kiliçgun Uçar ra eşkerayîyêke dîyaye. Çîgdeme hêverî rojnamegerî Nazim Daştan û Cîhane Bîlgîn yad kerdî.

Çîgdeme vat: ''Tecrîdê Îmraliyî bi giranî dewam keno. Tecrîdo ke bêhuqûqî û nêçareserkerdiş o tercîhê îqtîdarî yo. No tecrîd bingeyê bêedaletîya vera komelî zî peyda keno. Krîzê Rojhelatê Mîyanênî resayî asta tewr berze û meseleya kurdan zî merkezê nê krîzan de yo. Coka na mesele ganî bêra çareserkerdene. Seba demokrasî, haştîye û serdestîya huqûqî ganî hêverî tecrîd bêro wedaritene. 

Wa tecrîdê vera Birêz Ocalanî cade bêro wedaritene ke seba azadîye û çareserîye o rolê xo bîyaro ca. Ganî partîyê muxalefetî, roşnvîrê welatî, dezgeh û rêxistinê demokratîkî zî na babete de qiseyê xo vajê û seba wedarîyayîşê tecrîdî têbigêrê.

Ma venga Meclîsî danê ke seba wedarîyayîşê tecrîdî, çareserîya meseleya kurdan û demokratîkbîyayîşê Tirkîya erk û mesuldarîyanê xo bîyaro ca. Wa her kes seba haştîye û azadîye vera tecrîdî vengê xo berz bikero.''

Dima Hemserekê DEM Partî Tuncer Bakirhanî qisey kerd û bale ante serebûtanê Sûrîye ser. Bakirhanî vat: ''Rojnamegerî Nazim Daştan û Cîhane Bîlgîn ameyê qetilkerdene. Ma ney şermezar kenê. Ganî dewlete îdareyê Rojawanî de dîyalogan bikera û meseleyan wina çareser bikera.''

Bakirhanî pare kerd ke ê qerardar ê ke seba çareserîye pêro hêzê xo bişuxilnê û vat: ''Seba ke Birêz Ocalan bieşko rolê xo bîyaro ca ganî berê Îmraliyî bêrê akerdene.''