'Rayraşîyayîşê Azadîye û Çareserîya Demokratîke' yo ke hetê Platformê Dezgehanê Demokratîkan ra çarçewaya Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de Amedî ra ver bi Anqara amebi destpêkerdene resa Adana.

Hemsereka Pêroyî ya DBPyî Çigdeme Kiliçgun Uçar zî tede raywanî taxa Dagliogluyî ya qezaya Seyhanî de ameyî têhet. Çalakîye de sloganê sey “Bijî berxwedana Rojava”, “Her der Rojava, her der berxwedan”, “Bijî bexwedana gelê me” û “Jin, jiyan, azadî” ameyî vatene.

Hemserekê Federasyonê Komeleyanê Paştdayîşê Keyeyanê Tepişteyan û Hukmwerdeyan  (MED TUHAD-FED) Kerem Canpolatî vat: ''Ma şerî nêwazenê, haştîye wazenê. Heta ke tecrîd nêqedîyo çareserîye nêbena. Gama ke dewlete Birêz Ocalanî reyde pêvînayîşî kerdêne cenazayî nêameyêne. Wa îradeyê şarê ma nêro binpaykerdene û tecrîd bêro wedaritene. Heta ke meseleya kurdan çareser nêbo şerî nêqedîyenê.''

Endamê Kongreya Îslamê Demokratîkî (DÎK) Emîn Ayyî zî vat: ''Ma semedê pero şaran haştîye wazenê. Dewlet Bahçeliyî zî vengdayîşê xo de vat Birêz Ocalan eşkena meseleya çareser bikero. Ganî cade Birêz Ocalan bibo azad ke mesele çareser bikero.''

Wekîla DEM Partî ya Mûşî Summeye Boz zî nê vatî: ''Ma semedê demokrasî, çareserîye û azadîya Birêz Ocalanî ver bi Anqara rayra şinê. Ma semedê pêro şaran rayra şinê. No rayraşîyayîşê hêvî yo. Perspektîfê Birzê Ocalanî eşkenê Rojhelatê Mîyanênî de rayîrê çareserîye ramojnê. Hetêkî ra semedê haştîye veng danê hetê bînî ra ma genê binê ablûqa. Tîya ra zî samîmîyetê înan bewlî beno. Înan bi xo adresê çareserîye ramona ma zî reyna adresî ramojnenê. Paradîgmaya Birêz Ocalanî eşkena pêro probleman çareser bikero. Heta azadîya Birêz Ocalanî û çareserîya meseleya kurdan no rayraşîyayîş do dewam bikero.''

Badê qiseykerdişan raywanan verê xo da Mersinî.