Rayraşîyayîşê Azadîye baskanê Wan û Qersî ra 1ê sibate de dîyabi destpêkerdene û siba do bireso Amedî. Baska Qersî resaye Êlihî. Şarî dekewtişê şaristanî de bi vilikan raywanî pêşwazî kerdî, meşaleyî vistî ta û fîşekî eştî.

Şarî û raywanî bi sloganan govende girewte û seba azadîya Rayberê Şarê Kurdî Abdullah Ocalanî 75 balonê sipîyî ameyî perrnayene. 

Wekîlê DEM Partî Cengîz Çîçekî merkezê şaristanî de qisey kerd û pare kerd ke seba çareserîya meseleya kurdan azadîya Abdullah Ocalanî şert o. Çîçekî vat: ''Şarê kurdî seba azadîye edaletî nê rayraşîyayîşî keno. Ma do qetî rayîrê xo ra anêgêrê û rûmetê xo ra fek vera nêdê. 

Erdê Kurdîstanî do bibo erkê têdûştî û azadîye. No rayraşîyayîş defkerdişê qeyûman o û pîlkerdişê têkoşînê demokrasîyî yo. Ma bi serran o mîyanê faşîzmî de ciwîyenê. Heta ke Birêz Abdullah Ocalan azad bibo ma do rayraşîyayîşê xo rê dewam bikerê. Serkewtiş do bibo ê kurdîstanijanê xoverdayoxan.''