Rayraşîyayîşê Azadîye yo Pîl o ke semedê azadîya fîzîkîye ya Rayberê Şarê Kurdî Abdullah Ocalanî Qersî ra kewt rayîr, resa Sêrtî.

Raywanê Azadîye saetanê serê sibayî de resayî qezaya Veysel Karanî.Tîya turbe ame zîyaretkerdene û dima ra bi slogana “Bijî berxwedana zindanan” rayraşîyayîş ame kerdene. Badê rayraşîyayîşî eşkerayîye ameye dayene. Parlamentera DEM Partî Newroze Uysal Aslan bale ante tecrîdê giranî ser û vat: ''Heta ke no tecrîd meqedîyo ne krîzê ekonîmî ne zî krîzê bînî yê welatî qedîyenê. Ma 75 kesî semedê qedîyayîşê nê krîzan û hûzûrê şarê xo rayra şinê.''

Dima Newela Qesaba de ya  ke kommezelî tede yê vîrameyîş ame kerdene. Wekîkanê DEM Partî seba ke nika serê kommezelan de vîlayî yenê viraştene hêrsê xo ard ziwan û vat wazenê kesê ke qetil kerdî merdimanê înan ra zî qesas bîgêrê. Mezelan ra tersenê.

Badê qiseykerdişan şîîra ''Nameyo bîn ê ciwîyayîşî xoverdayîş o'' ya ke zanyarê kurdî Musa Anterî semedê Newela Qesaba nuşte ameye wendene.

Vîrameyîş de bi slogananê "Şehîd namirin" vilîkî ameyî ronayene û semedê azadîya Rayberê Şarê Kurdî Abdullah Ocalanî gogerçînê sipîyî ameyî firdayene.

Raywanê Azadîye tîya ra ravîyartê merkezê Sêrtî û tîya bi coşî ameyî pêşwazîkerdene. Şar bi pankartê ''Sêrt rayraşîyayîşê azadîye selam keno'' heta banê DEM Partî rayra şi. Badê rayraşîyayîşî govende ameye girewtene.

Hemsereka Pêroyî ya DBPyî Çigdeme Kiligun Uçar tîya qisey kerd û nê vatî: ''Semedê azadîya şarê kurdî û Birêz Ocalanî şarê Sêrtî payan ser o. Vengo verên ê semedê heq û azadîya şarê kurdî Sêrtî ra vejîya. Şima mojna pêrûne ke têna yew muxatabê meseleya kurdan est o û o zî Birêz Abdullah Ocalan o. Birêz Ocalan 25 serrî yo xover dano. Elçîyê haştîye Birêz Ocalan o.''