Rayraşîyayîşê Azadîye yo Pîl o ke semedê azadîya fîzîkîye ya Rayberê Şarê Kurdî Abdullah Ocalanî Qersî ra kewt rayîr, resa Farqînê Amedî. Saetanê serê sibayî de rayrîê Lîcê-Farqînî de rayraşîyayîşêko pîl ame kerdene. Raywanê Azadîye ke bi vilikan ameyî pêşwazîkerdene heta merkezê qeza bi slogan û deyîran rayra şîyî.

Çalakwanî rixmê heme qedexe û astenkerdişan resayî merkezê qeza. Tîya Parlamentera DEM Partî Newroze Uysal qisey kerd. Uysale vist vîrî ke rayraşîyayîşî des rojî xo dima verdayî û nê vatî: ''Ma roja verêne zî vatbi, no rayraşîyayîş ne verên ne zî  peyên o. Heta azadîya Birêz Ocalanî do no rayraşîyayîş dewam bikero. Ma şima rê selamê Kelaya Qersî, Koyê Araratî, Dîgorî, Sakîne Cansiz, Hayri Durmuş, Ceylane Onkolî ardî. Kurdî bi seserran o hesretê azadîya xo yê. Kurdî raştê zaf qirkerdişan ameyî. Farqîn de demê nêzdî de bi desan ciwanî ameyî qetilkerdene. Ma vera mergî sîyAsetê cuye rayra benê. Ma rayraşîyayîş de çimanê dayîkan de hesretê haştîye vînenê. Dewlete nê ra tersena.  Eke Rayberê şarê kurdî binê tecrîdî de yo, şarê kurdî zî binê tecrîdî de yo. Vera înanê ke kurdan nêvînayîşî ra yenê, her ca do bibo paytextê xoverdayîşî. Nameyê rayraşîyayîşê ma Rayraşîyayîşê Azadîye yo û ma do na azadîye bîyarê.''

Newroze Uysal vist vîrî ke 13ê sibate de do wird hetê rayraşîyayîşî biresê Amedî û veng da şarê Amedî ke wa tewrê rayraşîyayîşî bibo. Çalakwanî dima ra şîyî banê DEM Partî ya qeza.