Rayraşîyayîşo derg ê Neu-Munsterî ra heta Kielî yê vera Komployê 15ê Sibate vizêr pê nawnayîşêk qedîya. Tewr tay 70 kesî tewrê rayraşîyayîşî bibi. 

Rayraşîyayîşî çarçewa 'Wextê ci ameyo, Abdullah Ocalanî rê Azadîye' de vizêr Kielî ra dest pêkerd. Rayraşîyayîş de fotografê Rayberê Şarê Kurdî ameyî kiriştene. 

Înîsîyatîfê Rojava Hamburg, Kiel FEDA, Jiyana Jin, TEV-ÇAND Kiel, MLKP û Hamburg û Lubeckî ra tay kurdîstanijî tewrê rayraşîyayîşî bibî. Rayraşîyayîş de sloganî ameyî vatene.

Kiel de verê HBFyî de nawnayîş ame kerdene. Nawnayîş de temsîlkarê FED-DEMî Îmam Semsûrî qisey kerd û vat: ''Şert û zehmetî se benê wa bibê no şar dormeyê Rayberîye de kom bîyo û azadîya ci wazeno.''