Raywanê Azadîye yê ke semedê azadîya fîzîkîye ya Rayberê Şarê Kurdî Abdullah Ocalanî Qersî ra kewtî rayîr ewro resayî Dêrsim.

Bado ke merkezê bajarî de rayraşîyayîş ame kerdene û Meydanê Seyîd Rizayî de eşkerayîye ameye dayene mezelê sîyasetmedaran Sakîne Cansiz û Aysele Dogan ameyî zîyaretkerdene.

Parlementera DEM Partî Zeynepe Oduncu vist vîrî ke Sakîne Cansiz pîya bi di embazanê xo Paris de ameye qetilkerdene û vat: ''Nê hîrê embazê ma Têkoşînê Azadîye yê Kurdan de ma rê bîyî roşnayî, rayîr mojna. Qetilkarî hema zî nêameyî eşkerakerdene. Ma sey cinîyan wayîrê mîrasê înan vejîyen û rêçê înan de şinê. Sakîne Cansiz vatêne 'Tim pêrodayîş bi cuyeya mi', ya  tim pêrodayîş bi cuyeya ci. Zîndanê Dîyarbekîrî de tukerd rîyê Esat Oktayî. Ma sey têkoşêranê azadîye zanê ke ma do ser bikewê. Ma roja 8ine ya rayraşîyayîşî de reyna vanê ke wa semedê azadîya Birêz Abdullah Ocalanî û statuyê şarê kurdî cade gamêke bêro eştene. Têkoşînê embazanê ma erjîyayeyan têkoşînê ma yo.''

Badê qiseykerdişê Oduncu nuşteyê Abdullah Ocalanî yo ke derheqê Qirkerdişê Parisî de amebi nuştene, ame wendene û vilîkî serê mezelê Cansize ser o ameyî ronayene.

Raywananê Azadîye mezelê Aysele Dogan zî zîyaret kerd.