Xoverrodayîşê grevê vêşanîye yê Strasboûrgî ra Yuksel Koç vizêrî semedê giranbîyayîşê rewşa eyî ya weşîye ra amebi berdene bi nêweşxane û newe ra agêrabi cayê çalakîye. Dr. Fahrettîn Gulşeno ke rewşa çalakwan ca de teqîp keno, zanayîşî dayî.
Grevê vêşanîye yê bajarê Strasboûrgî yê Fransa yo ke vera tecrîdkerdişê Rayberê Şarê Kurdî Albdullah Ocalanî bi bêpeynî û bêagêrayîşî yeno kerdene 48 rojî pey de verdayî. Dr. Fahrettîn Gulşen seba rewşa weşîya Yuksel Koçî de zanayîşî dayî û ard ziwan, Koç tedawî qebul nêkeno û nika binê kontrolî de yo.
Dr. Gulşenî vat, roja 46’ine ra dima persê zerrî û reyna sîstemê hezmkerdişî leşa Koçî de ameyî tespîtkerdene û dîyar kerd, vizêrî saete 13’î ra tepîya madeyî de dejo giran, dejê zereyî, dewqe, vingayîşê goşî, xirabîyayîşê konsantrasyonî peyda bîyî.
Yuksel Koç vizêrî 7 saetî servîsê lezabezî yê nêweşxaneyî de mend û dimayê kontrolî seba ke tedawî red kerdo reyna agêrabi cayê çalakîye. Dr. Fahrettîn Gulşen, derheqê kontrolo ke nêweşxaneyî de Koçî ra ame kerdene de vat, persê oksîtbîyayîşê kezebe heme organan rê tesîr kerdo. Seba ke leşa Koçî de gonî baş pak nêbena, organê bînî zî nêeşkenê baş bixebitîyê, coka beno bêhal, dewqe û seredejî peyda benê.
Koç û çalakwanê bîn ê grevê vêşanîye hetê Dr. Fahrettîn Gulşen û hemgureyan eyî yê bînan ra yenê kontrolkerdene. Koç tim zereyê cile de maneno, teberê çend kesanê keyeyê xo zîyaretkerdoxan qebul nêkeno.
Dr. Fahrettîn Gulşenî vist vîrî ke grevê vêşanîye 48 rojî pey de verdayî û vat, her game beno ke rewşa çalakwanan biba girane û rewşêka xirabêre biqewemîyo.
