Rewşa tepişte Yusufogluyî bena giranêr

Rewşa tepişteyê nêweşê giranî Ridvan Yusufogluyî bena giranêr ke serrêke û di mengan ra dima cezaya ci ya zîndanî do biqeda. Keyeyê ey waşt ke wa Yusufoglu cade bêro veradayene.

Rida Yusufoglu 1992 de Mêrdîn de amebi tepiştene û 29 serrî yo zîndan de yo. Yusufogluyo ke Zîndanê Patnosî yê Agirî de tepişîyeno, 17 serrî yo tede nêweşîya ulseratîf kolîtî est a. Rewşa Yusufogluyî 5ê êlule de bîye giranêr û o wedarîya nêweşxaneyî.

Birayê Yusufogluyî Mustafa Yusufogluyî pare kerd ke rewşa kekê ci bena giranêr û vat: ''Ez key şîya pêvînayîşê ci rewşa ci hîna xirab asayêne. 5ê êlule de o wedarîya nêweşxane. Dermanê ci nêdîyenê ey. Ma dermanî berdî la îdareyî dermanî teslîmê ey nêkerdî. Nêweşîya kekê mi kronîk a, çimê ci de zî problem est o û tede fitik zî est o.

Ma wazenê wa kekê mi sewqê Wanî yan zî sewqê Amedî bibo. Uca de beşê nêweşîya ey est ê. 4-5 serrî yo ma ney wazenê. Cezaya kekê mi serrêke û 2 mengan ra dima qedîyan. La eke wina dewam bikero o do zîndan de bimiro. Heta nika cenazayê zaf kesan zîndanan ra vejîyayî. Eke kekê mi zîndan de bimiro kam do hesab bido ma? Vengê ma bieşnawê. 12 serrî yo dadîya mi zî nêeşkena şora pêvînayîşê ey. O zî wazeno wa dadîya ma şora ey bivîna. Wa birayê mi bêro tedawîkerdene.''