Meltem Oktaye ya mûxabîra Ajansê Xeberan ê Dîcle yo ke amebi girewtene, Hepisxaneyê Cinîyanê Girewteyî yê Tîpê M’yî  ra, derheqê grevanê vêşanîye de beyanatî resnayî teber. Oktaye bi telefon keyeyê xo de qisey kerd û va rewşa weşîya çalakwanan Hacer Halîle Yusufe, Ruhşan Bozane, Ozlem Ozdemîre, Ayten Gulsume, Ozlem Soylere bîya girane.

Oktaye derheqê rewşa weşîya çalakwanan de beyanatê winasîyî dayî: “Embazanê gruba verêne de kêmîbîyayîşê kîloyî yeno dîyayene. Embazan nêzdîyê 8-10 kîloyî kerdê vîndî. Tansîyon û nabiz zaf kewto. Dejê sereyî û dejê esteyan her ke şono beno zêde. Madeyê ci keweno were, adirê ci beno berz û bêhalîye peyda bîya. Çalakwanî vera vengî û boye zaf bîyê hasas. Bê desteg nêeşkenê rayîr ra şorê û qiseykerdişê înan bîyo giran.”

Oktaye va doktorê hepisxaneyî hewte de 2 dolimî yeno kontrol û wina dewam kerd: “Doktor tim wazeno ke bierşawo nêweşxane. Çalakwanî zî nêwazenê şorê nêweşxane û mudaxaleyî qebul nêkenê. Awe, şekir, lîmone û sole seba çalakwanan zaf muhîmê la zaf şenik dînyenê çalakwanan.” Qaso ke Oktaye vana 1’ê Adare ra nata hûmara çalakwanan bîya 31. Reyna qaso ke Oktaye vana 1’ê Adare ra nat rojnameyê Yenî Yaşamî seba ke moral dano çalakwanan ameyo qedexekerdene û nêdîyeno çalakwanan.