Bajarê Marsîlya yê Fransa de roja yewşemeyî kombîyayîşê şarî ame viraştene. Avûkate Serbay Koklu ya ke tewrê kombîyayîşî bîye ard ziwan ke 2016î ra nata Ocalanî ra qe xeberêk nêameya girewtene.

Kombîyayîşo ke hetê Têgêrayîşê Cinîyan ê Kurdan ê Fransa (TJK-F) ra ame organîzekerdene, çalakwananê grevê vêşanîye ya pîya nizdê 200 tenî tewrê ci bîyî.

HEME HEQÊ HUQÛQÎ YENÎ BINPAYKERDENE

Avûkatanê Buroya Huqûqî ya Çaxî ra Serbay Koklu vist vîrî ke înan 27ê Temmuze ya 2011î ra nata Ocalanî dir pêvînayîşî nêviraştî va:‘‘ Destûr nêdîyeno ke Birêz Ocalan bi avûkatanê xo dir pêvînayîş virazo. Tîya de tena heqê ma yê pêvînayîşî nê, heme heqê huqûqî yê Birêz Ocalanî yenî binpaykerdene. Huqûqê Ewropa de no sey sucî yeno qebûlkerdene. Îmrali de mekanîzmayê neweyî kewtî dewre. Heta nika seba vernîgirewtişê pêvînayîşî behaneyê neweyî vetêne. Reya ewilêne menga Adare ya 2018 de muracatê ma bi qerarê dadgehe ame redkerdene. No zî demêkê neweyî îfade keno.‘‘

CPT Û MHME RAŞTÎYA ESTBÎYAYÎŞÊ XO ÎNKAR KENÎ

Koklu bale ante bêvengîya Komîteya Vernîgirewtişê Îşkenceyan (CPT) û Mehkemeya Heqanê Merdiman a Ewropa (MHME) û vat ke CPT û MHME xora 2016î ra raştîya estbîyayîşê xo înkar kenî. Xora Birêz Ocalanî zî vatêne ‘no tena sîstemê dewletêk nêyo. Guantanamoyo ke bi bêhuqûqîya ci heme dinya wirzena lingan ser hendê Îmrali nêyo.‘

Qiseykerdişan ra dima derheqê mucadeleyê Ocalanî de sînevîzyonêk ame serykerdene û kombîyayîş bi slogananê 'bijî serok Apo' yî qedîya.