Qezaya Pendîkî ya Îstanbulî de berê baxçeyî yê keyeyêkê elewîyan ame nîşankerdene û dêsê apartmanî ser o 'elewîyan rê merg' nusîya.
Roniştoxanê apartmanî nê gefî ra dima venga polîsan da. 

Wayîra keyeyî Şehrîbane Îşler derheqê mesele de qisey kerd û vat: ''Nê apartmanî de 5 keyeyî ciwîyenê. Ma pêro elewî yê, nê kuçeyî de zî exlebî elewîyî ciwîyenê. Wexto ke ma nuşte dî zaf qerqilîyayî û tersayî. Kam çira wina keno.''

Mêrdeyê Şehrîbane Kemal Îşlerî zî vat: ''Pêro bîna qerqilîyane, domanê ma estê ma seba înan tersenê.

Roniştoxanê apartmanî ra Muhterem Aydogdu zî venga selahîyetdaran da ke cade serebût eşkera bikerê.