Roja 73’yî yê grevê Strasboûrgî: Rewşa çalakwanan bîya girane

Çalakwananê grevê vêşanîye yê Strasboûrgî de, hetê weşîye ra problemê mendeyî vejînê meydan. Doktorî wazenê ke hem seba çareserîye gamî bêrê eştene, hem zî wazenê ke hurmet bidîyo îradeyê xoverdayoxan.

Doktor Fahrettîn Gulşenî derheqê rewşa weşîye ya 14 çalakwananê grevê vêşanîye yê Strasboûrgî de beyanat da.

Qaso ke Dr. Gulşen vano, kontrolê çalakwanan ameyo kerdene û goreyê hewteya verî, çalakwanan xeylî kîloyî kerdê kêmî. Reyna goreyê Dr. Gulşenî, masulkeyê çalakwanan helînê û no zî rayîrê krampî akeno û tesîrê ci bi organanê zereyî giran beno.

Dr. Gulşenî va rîskê winasîyî nika çalakwanan de vejîyê meydan: krampê mîde û roqila, xerabbîyayîşê rîtmê zerrîye.

TAYÊ ÇALAKWANÎ ZAF BÎYÊ ZEHÎFÎ

Dr. Gulşenî derheqê rewşa weşîye ya çalakwanan de wina dewam kerd: ”Çalakwanan ra Nîmet Sevîmî no hewte zaf kîloyî kerdî kêmî. Reyna Ekrem Yapici zî zaf bîyo zehîf. Rewşa çalakwananê bînan zî wina ya. Tansîyonê  înan zaf benê kêmî û çimê  înan baş nêvînenê. Vera veng û roşnîye zaf bîyê hesas, çermeyê înan hurîyeno û maseno.

BEDENÊ ÇALAKWANAN DE XISARÊ MENDEYÎ DO BIMANÊ

Grevê vêşanîye ewro bi hawayê serkewtişî biqedîyê zî, çalakwanan de problemê norolojîkî do dewam bikerê. Problemî girêdayîyê sîstemê sînîrî yê. Bi texmînî tansîyono berz û nizm her dem dewam bikero. Problemê ci yê masulke û mobikan do dewam bikero. Rîskê îltîhab û helîyayîşê esteyan zî dewam bikero.”

Reyna goreyê vatişanê Dr. Gulşenî, çimê Kardo Bokanîyî hetê roşnîye ra bîyê kêmî û baş nêvînenê.

DR: GULŞENÎ WAŞT KE WA HURMET BIDÎYO ÎRADEYÊ ÇALAKWANAN

Dr. Gulşenî qiseykerdişê xo wina domna: ”Ma muracatê Rêxistinê Doktoranê Sînornasnekerdeyan û Rêxistinê Weşîye yê Dinyaye kerd ke wa grevê vêşanîye ca de teqîb bikerê û cigêrayîşan bikerê. Çi heyf ke heta nika qet yew sazîye nêameya.”

Dr. Gulşenî va wexto ke çalakwanî şonê nêweşxane îradeyê ci rê hurmet nêno dayene û wina dewam kerd: ”Mesela Kerem Solhan hetê weşîye ra kewt tenge û naye ser ma muracatê yew sazîya weşîye kerd. La sazîye seba ke tedawî bikero tedayî bi Solhanî kerdî. Sazîye wina va: ”Ma do to berê nêweşxane, la bi yew şertî. Tedawîyî qebul bîke”.

Dr. Gulşenî rêxistinê weşîye yê mîyanneteweyîyî rexne kerdî û wina va: ”Ganî rêxistinanê weşîye, na mesela ser bivinetêne. Seba ke merdimî hetê weşîye ra bibê baş û rawirzê xo ser, kewtê têkilîyanê sîyasîyan dima.”