Muxabîra Ajansê Mezopotamya (MA) Esra Solîn Dal 26ê nîsane ra heta nika Zîndanê Bakirkoyî de hucreyê yewkesî de tepişîyena. Esra zîndan de raştê cigêrayîşê rûtî ameya. Hemsereka Pêroyî ya ÎHDyî Erene Keskîna ke rojnamegere Esra Solîn Zîndanê Bakirkoyî de zîyaret kerda, derheqê rewşa Esra Solîn de ANFyî rê qisey kerd.

Erene Keskîn da zanayene ke Esra rê teyna cigêrayîşo rût nêameyo ferzkerdene û Esra rê bi zorî ame ferzkerdene ke a wa belgeya 'ez endama rêxistine ya' îmza bikera.

Erene Keskîn pê hesna ke Esra hucre de mîyanê tevcrîdî de ya, hîrê rojan werd nêdîyayo aye û di rojan qetî hucre ra nêameya vetene. 

Erene Keskîn vat: ''Îdareyê zîndanî xîret kerd ke bi zorî bi Esra belegeya 'ez endama rêxistine ya' bido îmzakerdene. Esra no kerdiş qebul nêkerdo û verê ci vejîyaya. No kerdişê îdareyê zîndanî kerdişêko bêqanûnî yo. Esra waşt ke hucre ra bêra vetene û koxûş de bêra tepiştene. Ganî komel, muxalefet û dezgehî vera kerdişanê winayênan tewirê xo bimojnê.''

Erene Keskîn ard ziwan ke Solîne xebatanê xo yê rojnamegerîye ra tepişîyaya û vat: ''Xora wextê mehkeme de aye rê persê sey 'Ti çira xeberanê winayênan kena' ameyê perskerdene. Dewleta tirke Peymana Heqanê Merdiman a Ewropa îmza kerda la goreyê ci tênêgêrena. Destbendkerdiş û tepiştişê rojnamegeran nênê qebulkerdene. Nê kerdişî kerdişê dîktatorîye yê.''