Rojnameyê Dêrsimî bi manşetê “Coşê wisarî do bi adirê Newroze bibo şên” vejîya û çapê neweyî de reyna nuştoxê hêcayî, xeberê muhîmî û fotografî ca gênê. Nuşteyê daşinasnayîşê rojnameyî de wina ame vatene:

Her 5 serre de yew dolime, sindoqa weçînayîşî yena verê weçînitoxan. Munaqeşeyê demokratîkbîyayîşê weçînayîşî yew het de bimano, panc serrî de rey weçînayîş çîyêko muhîm o. Labelê sey her weçînayîşî, nê weçînayîşî de zî, hedefê propagandaya Enqere de talebê demokrasîyî vejîyayî ver. Tivana qey seba ke HDP’yî rê dişmenîye bikerê, yewbînî de kewtê musabaqa.

Derd kifş o, wazenê ke bêveng-bêveng weçînayîşê 31’ê Adare de bibê serkewte. La îradeyo ke şanê 31’ê Adare de do bivejîyo meydan,ne wazenê bivînê, ne zî wazenê biheşnê. Bêvengîya CHP’yî û uslûbê sîyasetê ci, çi hefy ke tedayê serê HDP’yî hîna keno zêde. Çira sindoqe verê komelî de yena ronayene? Helbet seba ke herêman kam îdare bikero weçînayîş yeno kerdene û şar zî nê îdareyî do biweçîno. Ganî nê rê tehamul bêro musnayene. Eke wazenê welatî sey ferasetê xo îdare bikerê, o wext verê şarî de, çira sindoqe nanê ro? Tîya de munaqeşeyê meşruîyetî heqê kesî nêbo ganî.

Îradeyo meşru, îradeyê şarî yo. Bêedaletîye her hetê cuye de hukim domnena. Yew pêroyê îmkananê dewlete û çapemenîye şuxulneno, tehamul nêmusneno muxalefetî û na rewşe bi xo zî musnena ke weçînayîş do bi senî hawayî bêro kerdene. Ma yew kampanyaya weçînîyayîşî ya bêedalete de ameyî têrî. Kifş o ke îradeya ke do bajaranê Kurdan de bivejîyo meydan ra tersenê. Naye ra zî ekranê televîzyonan û çapemenîye HDP’yî rê kerdê qedexe. La şarî qeyûmî dîyî, xebatê înan nêzdî ra teqîb kerdî û zanê ke kamcîn ê înan o kamcîn nîyo. Doneyê anketan zî musnenê. Şarê herême, îradeyo ke bi weçînayîşê înan ser keweno wazeno. Wina aseno ke şaro Kurd do 31’ê Adare de, coşê wisarî bi adirê Newroze şên bikero û qeyûman peyser bierşawo Anqara.”

Nuştoxê Rojnameyî wina yê: Muzaffer Orûçoglu,Ferhat Tûnç, Ergîn Dogrû, Esra Çîftçî, Hamza Aksut, Daîmî Dogan, Hakan Kerîmoglû, Musa Ozguroglu, Bahadir Altan,  Dizgûnê Dewresî, Dogan Munzuroglu, Can Kasapoglu, Medîha Gurgoze, Hasan Alî Kiliç, Ahmet Can Akyol, Huseyîn Ozan, Hidir Işik, Ahmet Guden.