14ê hezîrana 2018î de merdim û pawitoxamê Wekîlê ê çaxî yê AKPyî yê Riha Îbrahîm Halîl Yildizî keyeyê Şenyaşarî ra 3 kesî qetil kerdbî. Emîne Şenyaşar û Ferît Şenyaşar 820 rojî yo seba ke kiştoxî bêrê cezakerdene nobeta edaletî de yê.

 Dewaya ke bi îdîaya 'heqaretê Îbrahim Halîl Yildizî kerdo' Emîne Şenyaşar rê ameye akerdene de roniştişê ci yo yewin  Mehkemeya Cezaya Girane ya Riha de ame kerdene. Emîne Şenyaşar, lajê ci Mehmet Şenyaşar û avûkatê înan roniştiş de amade bîyî.

Emîne Şenyaşar waşt ke mehkeme bi kurmanckî pawitişê xo bikera. Emîne Şenyaşar persê hakîmî yê 'Ti zewijnaye ya, çend domanê to est ê?' ser o, cewabê 'Mêrde û domanê mi ameyî qetilkerdene. Nika wazenê ke domananê min ê bînan zî bikişê' da. 

Emîne Şenyaşar mehkeme de vat: ''Ez bê dermanî nêeşkena rabikewa. Lajê min o bîn 5 serrî yo hucreyê yewkesî de tepişîyeno. Mi vîr a nêşino ke domanê mi û mêrdeyê mi senî kişîyayê. ''

Mehkeme waştişê avûkatî ser o seba ke dozger mutalaya xo amade bikero roniştiş taloqê 29ê teşrîna peyêne kerd.

Keyeyê Şenyaşarî roniştişî ra dima reyna şi verê Edlîyeya Riha û dest pê nobeta xo kerd.