Demîrtaşî Leyla Guvene ke grevê vêşanîye de ya silam kerd

Roniştişê dawaya hemserekê verênî yê HDPyî Selahattîn Demîrtaşo ke rehîn ameyo girewtene virazîya. Demirtaşî Leyla Guvena ke kewta grevê vêşanîye silam kerd. Mehkema qerarê ‘bêgureyîye’ da, dosya şirawite Mehkemaya Ceza ya Aslîye ya 2. ya Stenbolî.

Roniştişê dewaya Selahattîn Demîrtaşî ke bi îdîaya heqaret ro serekwezîrê verênî Ahmed Davutogluyî ameyo kerdene ame viraştene.

Parlamenteranê HDPyî ra Mahmut Togrul, Alî Kenanoglu, Dilşad Canbaze zî tede xeylî îdarekeranê qeza û bajaran zî roniştiş sêr kerd. Demîrtaş bi SEGBÎS tewrê roniştişî bi.        

Roniştiş bi munaqeşe destpêkerd. Dadgerê mehkema Bekîr Nabî Çelenî waşt ke tayê sêrkerdoxî salone ra bêrê vetene û parlamenterî rêza peyêne de ronişê.

Dadgerî verê roniştişî qerarê xo eşkera kerd û hewna ke roniştiş dest pê nêkerdibi vat do qerarê ‘bêgureyîye’ bido.

Demîrtaşî roniştiş de hemsereka KCDyî Leyla Guvena ke dest bi grevê vêşanîye kerdo zî silam kerd.

Gama salona roniştişî de sloganê sey “serek Selo” û “tepişteyê sîyasîyî rûmetê ma yê” bîyî berz, dadger Çelenî tehdîdê “şima wazenê ke polîs bêro tîya, mexdurîyet virazîyo” ro înan kerd.

Dadgerî qerarê xo de vat ke Mehkemaya Ceza ya Aslîye ya 2. ya Stenbolî do biewnîro na dewaye ra û şirawite na mehkema. Parlamenterê HDPyî Togrulî vat ke di serrî yo ra vêşêr o ke parlamenterê înan, hemserekê pêroyî û hemserekê şaredarîyanê înan zî tede xeylî sîyasetkarî tepişte yê û vat: “Seyîd Rizayo ke ver bi îdamî şino vano ma do çok nêdê ro, ma zî mîrasê ê xo rê rayber gênê.”

Avûkat Epozdemîrî zî vat qeraro ke ameyo girewtene huqûqî nê, qerarêko sîyasî yo.