Amed de roniştişê dewaya vera 20 rojnamegeran ame kerdene. Avûkat û rojnamegerî Serdar Altan, Rohat Bulut, Mehmet Şahîn, Servet Yîgen, Kadîr Bayram, Elîfe Gungor, Esmere Tunç, Bêrîvane Karatoprak, Omer Çelîk tewrê mehkeme bîyî.

Roniştiş de eşkera bi ke îfadeyanê îtirafker Umît Akbiyikî ser o derheqê Esmere Tunç de îdîaname ameyo amadekerdene û dosya de ameyo yewkerdene. Pawitoxê şîrketa Pel Ajansî Hamît Akbalî roniştiş de beyanê ke polîsan sey îfadeyê ci dayê mehkeme red kerdî. 

Îtîrafker Umît Akbiyikî bi rayîrê SEGBÎSî mehkeme de vat ke Produksîyonê Pelî bi 'fermanê rêxistine' têgêreno û ey Kadîr Bayram û Esmere Tunç tîya de dîyê. 

Mehkeme bire daye ke şertê kontrolê edlîyî, qedexeyê tebervejîyayîşê welatî dewam bikero. Roniştiş taloqê 19ê teşrîna peyêne ame kerdene.