Çarçewa tehqîqatêkê Serdozgerîya Komare ya Anqara de 29ê teşrîna verêne ya 2022yî de 11 rojnamegerî ameybî destbendkerdene û nînan ra Mudira MA Dîrene Yurtsever, muxabîrî Bêrîvane Altan, Ceylane Şahînlî, Denîze Nazlim, Emrullah Acar, Hakan Yalçin, Selman Guzelyuz, muxabîrê JINNEWSî Habîbe Eren û Oznure Deger ameybî tepiştene. 

Nê 9 rojnamegerî û stajyerê MA Mehmet Gunhan û muxabîrê MA Zemo Aggoz siba do reya verêne vejîyê verê mehkeme.

Rojnamegerî pê 'endamîya rêxistine' yenê sûcdarkerdene. 

Roniştişo verêne ê dewaya vera 11 rojnamegeran roja sêşemeyî (siba) Mehkemeya Cezaya Girane ya Anqara de do bêro kerdene. Xeylêk temsîlkarê dezgehanê çapemenîye û rojnamegerî do dewa teqîb bikerê.