Metin de ke bi sernameyê ‘Ganî erdê ma de tena Kurdêk zî nêmiro’ ame weşanayene, bêvengîya siyaset û medya ya hemverê grevanê vêşanîye bi çetinî amî şermezarkerdene. Metnê hemparî de ame vatene, “Ma bihêrs ê, çunke gama dêzê DAÎŞ’î yê Sûrîye Baxoz gama ke verê çend rojan ame rijnayene, şerwanê Kurdan ameyî silamkerdene, labelê serra 2019’î de beno ke mîlîtanê cinî û camêrdî yê Kurdan rîyê bêxemîya pêroyîye ra bimirê.”

Metnê hemparî yo ke rojnameyê Humanite de ame weşanayene de ame vîrardene ke zîndanan de heta nika xeylî tepişteyan cuya xo vîndî kerda û ame vatene, “Bi hezaran Kurdî zîndananê Erdoganî de helênê. 8’ê Mijdar a 2018’î de Leyla Guvene dest bi grevê vêşanîye kerd û nika verê mergî de ya. Zîndanan de bi hezaran tepişteyî kewtê grevê vêşanîye û merg girewto çim. Înan ra 8 kesan cuya xo vîndî kerde. Tirêm çew qalê nê keno?”

Metin de ame vatene, “Ma veng danê ke wijdanî bibê haya” û hukmatê Fransa ra ame waştene ke çalakwanan dir pêvînayîş bikero.

Metnê vengdayîşî de ame vatene, “Seba azadîya xo ganî ma Kurdanê ke meterîs de yê înan rê bibê hetkar û vengê înan bidê eşnawitene. Ma hukmatî ra wazenê ke çalakwananê Strasbourgî reyde pêvînayîşan bikero.”

Heman wextî de bêvengîya medyaya Fransa zî amî krîtîkkerdene û ame vatene, “Ma veng danê medya ke bêveng memano û derheqê çalakîyanê grevê vêşanîye de xeberan bido û waştişanê înan pê bihesno. Ma veng danê heme demokratanê Fransa zî na bêxemîye rê peynî bêro ardene, vero ke çalakwanî bimirê seferber bibê.”

Peynîya metnê vengdayîşî de ame vatene, “Seba ke Fransa bibo haya, ke welatêkê heqanê merdiman a, ganî çalakwanê Strasbourgî bimirê?” Veng ame dayene ke peynî ro bêvengîya hemverê xoverdayîşê grevanê vêşanîye bêro ardene.

Kesê ke morê xo dayo binê metno ke rojnameyê Humanite de ame weşanayene: Ariane Ascaride (Hunermenda sînema), Josiane Balasko (Dîrektore, nûştoxa senaryo), Rony Brauman (Doktor, Sereko verên ê Organîzasyonê Doktoranê Sînornenasan -MSF), Pierre Laurent (Senato, Sekreterê pêroyî yo verên ê Partîya Komunîste ya Fransa), Gérard Mordillat (Romannûs, sînemakar) û Robin Renucci (Aktor-Dîrektor).