Ronayoxanê PKKyî ra Sakîne Cansiza ke 9ê çeleyê 2013yî de payetextê Firansa Paris de ameye qetilkerdene serrgêra şehadetê ci de Dêrsim de ameye yadkerdene. Aktîvîteya yadkerdişî ke hetê TJA û Meclîsê Cinîyan ê HDPyî ra ameye kerdene Wekîlê HDPyî Ebru Gunay, Feleknaze Uca Alîcan Onlu, aktîvîstê TJA û îdarekarê DADî tewrê ci bîyî. Polîsan goristan girewt binê ablûqa û nêverda yadkerdiş serê gorê Cansize de bêro kerdene. Naye ser o verê goristanî de eşkerayîye ameye dayene.

Vervatoxa HDPyî Ebru Gunay eşkerayîye de vat: ''Ma reyna raştê şîdetê dewleta camêrdî ameyî. Amedî ra, Êlih û Xartpêtî ra cinîyan waşt tîya tewrê aktîvîteya yadkerdişî bibî. Dewleta tirke rolê ci nê qirkedişî de esto kerd ke verê ma bîgêro. Destûr nêda ke ma şirê goristan. Beno ke ma nêeşkê şirê goristan la ê se kenê wa bikerê nêeşkenê ver têkoşînê ma bigêrê. Ewro her hetê dinya de hîrê cinîyê şorişgêrî Sakîne Cansiz, Fîdane Dogan û Leyla Şeylemez yenê yadkerdene la ma tîya hetê walîyanê provokatoran ra yenê astengkerdene. Ma tîya ra veng danê nê provokkatoran ma do pê têkoşînê xo şima serûbin bikerê. Şima heme kiştoxê cinîyan do hesab bidê cinîyan.''

Gunaye ard ziwan ke pê Qirkerdişê Parisî ame waştene ke verê têkoşînê haştîye yê cinîyan bêro girewtene û vat: ''Şarê kurdî û dostanê înan no têkoşîn da domnayene. Qirkerdişê Parisî ra hîrê serrî cuwa pê embazê Sevê Demîr, Fatma Uyar û Pakîze Nayir ameyî qetilkerdene. Ê zî netîceya polîtîkayanê tecrîdî yê dewleta camêrdî de ameyî qetilkerdene. Ne Sevêyan têkoşînê xo caverda ne zî ma caverdenê. Têkoşînê Sakîne ya ke Zîndanê Amedî de vera Esat Oktay Yildiranî sere wedarit, ewro her hetê dinya ra vila bîyo. Eşqê azadîya cinîyan ê Sakîne cinîyan ê dinya ra vila bi. Cinîyî her cayê dinya de paştî danê têkoşînê cinîyan ê kurdan. La ma tîya nêeşkenê kênaya sereberze ya Dêrsimî Sakîne serê gorê ci de yad bikerê. Îqîtdar têkoşînê azadîye yê cinîyan ra terseno. Ma reyna Sakîne Cansiz, Fîdane Dogan û Leyla Şeylemez, Sevê Demîr, Fatma Uyar û Pakîze Nayir yad kenê sozê pîlkerdişê têkoşînî danê.''