Cansize Konferansê Şaran ê Mîyanneteweyî de ameye yadkerdene

Venezûela de, Konferansê Şaran ê Mîyanneteweyî yo ke hetê Têgêrayîşê Dewijan ê Bêerdî ra ame organîzekerdene de Sakîne Cansize ameye yadkerdene.

Konferansê Şaran ê Mîyanneteweyî yo ke hetê Têgêrayîşê Dewijan ê Bêerdî ra ame organîzekerdene, paytextê Venezûela Caracasî de dest pêkerd.

Konferansî de têgêrayîşê ke dinya de seba azadîye têkoşîn kenê,  ameyî têhet û babetê; têkoşînê vera emperyalîzmî, kapîtalîzm, zayendîperestî, endustrîkarî, nîjadperestî û mekanîzmayê sîstemê kolonyalîzmî yenê ercnayene. Konferansî de resimê awankerdoxanê PKK’yî ra Sakîne Cansiz a ke 9'ê Çele 2013'î de Parîs de ameyebî qetilkerdene zî ame dardîkerdene.

Yeno pawitene ke bi beşdarbîyayîşê 1500 delegeyan konferans bêro pê, labelê seba ke Venezûela de nê demanê peyanan de hetê sîyasetî ra serebûtî estê û nê seba beşdarbîyayîşê delegeyan benê asteng, formatê konferansî ame bedilnayene.

Konferans de vera krîzo ke Venezûela de esto de û vera darbeyêk, na game paştdayîş danê serekdewlet Nîcolas Madûroyî. Konferans bi çalakîyêka bi heybet a kulturî yê şarê Venezûela dest pêkerd. Konferans de rewşa peyên a sîyasî yê kolonyalîstanê dinya ameye ercnayene.

Şarê têkoşerî bi taybetî şarê Kurdistanî û Fîlîstînî ameyî silamkerdene.

CANSIZE ZÎ MABÊNÊ RAYBERANÊ ŞOREŞÎ DE CA GIREWT

Rexmê zaf astengan zî konferans bi beşdarbîyayîşê 300 delegeyanê wareyanê mîyanneteweyîyan ra û 200 delegeyanê Venezûelaye ra ame pê. Salona kongreye de resimê rayberanê şoreşî yê dinya ameyî dardîkerdene. Nê resiman ra yew zî resimê awankerdoxanê PKK’yî ra Sakîne Cansize bi. Konferans do 3 rojî dewam bikero.