Hemsereka Pêroyî ya Partîya Herêmanê Demokratîkan (DBP) Salîha Aydenîz derheqê prosesê rexneyanê serê Îtîfaqê Kede û Azadîye de ANFyî rê qisey kerd. 

Aydenîze da zanayene ke înan hêverî merkez de tay kombîyayîşî kerdî la dima hewcedarîye ser o bire daye ke pêro qeza û şaristanan de şarî reyde kom bibê. Aydenîze vat: ''Ma bire daye ke bingeyê rexnekerdiş û rexnedayîşî de prosesêk bidê destpêkerdene ke wa şar zî tede est bo. Ma çarçewa nê kombîyayîşan de serkêşîya şarê xo de prosesê verê ma awan bikerê. Ma kombîyayîşan de kêmasî, xeletî û rexneyan ercnenê û xeta têkoşînî ya newîye awan kenê.

Seba kombîyayîşan herême 7 parçeyî ameye kerdene. Her herême de heyetî ronîyayî. Nê heyetî zî qezayan de kombîyayîşan kenê. Bi taybetî cinîyî asta zêde de tewrê nê kombîyayîşan benê. Kombîyayîşan de tesbîtê girîngî yenê kerdene. Ma herêma Şirnexî de yê. Ma hema doneyê hewt herêman pêser nêkerdê. La ma dî ke şar bi giranî nê rexneyan keno; metodê dîyakerdişê namzetan, meseleya îtîfaqî û seba serekkomarîye namzetnêmojnayîşî. A raşte polîtîkaya ma ya îtîfaqî raşt bîye la ma qala îtîfaqî bi qîmî nêkerde. Reyna şarî ma rexne kerdî ke ma herinda rêxistinkerdişê rayîrê hîrêyînî de rayîrê sîstemî teqîb kerdê, îradeyê cinîyan esas nêgirewto, înîsîyatîfî ra dûrî kewto, goreyê tuzîkî tênêgêrayê, rêxistinanê herêmîyan înîsîyatîf nêgirewto, ma şarî ra dûrî kewtê.

Nê kombîyayîşî seba ke ma cewherê xo bimojnê girîng ê. Tesbîtê ke tede ameyê kerdene zî wina bîyî. Dewlete 2014 ra nata hêriş kena. Coka ma teng bîyê la hetê bînî ra ma zî bi destê xo rêxistinîya xo teng kerde. Ma bire daye ke rexneyanê xo bidê, rêxistinîya xo xurtêr bikerê û şarê xo esas bigêrê ke nê prosesî ra bihêzêr vejîyê. Nê prosesî de tesbîto tewr girîng no bi ke ganî ma serkêşîya şarî esas bigêrê. Nika kombîyayîşan de şar qisey keno, ma teyna goşdarî kenê. Naye ra dima zî ma reyna şarî de kombîyayîşan bikerê yanî heman metodî teqîb bikerê.

Ma do çarçewa rexne, waştiş, nêzdîbîyayîşê şarê xo de rotaya xo dîyar bikerê. Verê ma de weçînayîşê herêmî est ê. Ma kenê ke reyna bingeyê rêxistinîya xo awan bikerê. Sey DBPyî ma zî xo wina rexne kenê ke prosesê weçînayîşanê 14-28ê gulane de ma nêeşkayî bibê cewab û HDP hetê îdeolojî ra weye nêkerd. La ganî ma teyna goreyê weçînayîşan ney goreyê têkoşînî şikl bidê xo. Seba ke ma reyna heman xeletîyan nêkerê ma do şarê xo reyde têbigêrê. Şarê ma do rotaya ma dîyar bikero.''