Zîndananê Vakurê Kurdîstanî û Tirkîya de 27ê teşrîna peyêne ya 2020î ra nata vera tecrîdkerdişê Rayberê Şarê Kurdî Abdullah Ocalanî û binpaykerdişê heqan tepişteyê dewaya PKK û PAJKî grevê vêşanîye kenê. Grevê vêşanîye kewt roja 156 

Endama Heyetê Îdareyî yê Komeleya Huqûqnasan a Seba Azadîye (OHD) yê Amedî Adîle Salman derheqê mesele de ANFyî rê qisey kerd. 

Salmane da zanayene ke 5ê nîsana 2015î ra nata tecrîd vurîya astêka bîne û Îmrali de pêro pêvînayîşî qedexe yê. Salmane vat: ''Grevê vêşanîye yê 2018î dima ke pêvînayîşê avûkatan dest pêkerd qedîyabi. La 7ê tebaxa 2019î ra nata muracatê pêvînayîşî yenê redkerdene. Birêz Abdullah Ocalan çareserîya meseleyanê welat û Rojhelatê Mîyanênî yo. Îqtîdar pecrîdkerdişê ey xîret keno ke estbîyayîşê xo rê dewam bikero. Tecrîdî reyde şer, krîzê ekonomîk, sîyasî û komelkî zêdîyayî. Heta ke tecrîd dewam bikero nê krîzî zî do dewam bikerê.''

Salmane îfade kerd ke pê tecrîdê Îmraliyî komel gêrîyeno binê tecrîdî û vat: ''Tecrîd meseleyanê nikayênan keno pîlêr. Wedarnayîşê tecrîdî îmkanê çareserîya meseleya kurdan o. Dewletê ke qaşo demokrat ê vera tecrîdî bêveng ê. CPT zî semedo ke vera tecrîdî tênêgêreno beno hemparê nê sûcî. Ganî tesîrê tecrîdî komelî rê bêrê vatene û dezgehê sey CPTyî na mesele ser o xebitîyê.

Tepişteyî vera bêçaretîye bedenê xo vêşan verdenê û gêrenê çareserîyêke. Nika nê prosesî de zî tepişteyî pê tay waştişan grevê vêşanîye de yê. Ganî waştişê tepişteyan bêrê goşdarîkerdene, bidîyê eşnawitene. Verî ke felaketî biqewimîyê ganî na babete de gamêke bêra eştene.''